Энхтайваны гүүрэн дээр зорчиж явсан УБП 70-70 улсын дугаартай “Isuzu Wizard” маркийн суудлын автомашин, УБЧ 90-00 улсын дугаартай “Lexus RX 400” маркийн машинтай мөргөлдөж, суудлын тэрэг шатсан томоохон осол энэ сарын 18-наас 19-нд шилжих шөнө гарсан. Isuzu маркийн машинд зорчиж явсан хоёр залууг иргэн Д.Баттүвшин, Хан-Уул дүүргийн цагдаагийн ажилтан Г.Мөнх-Эрдэнэ нар аварч, ГССҮТ-д хүргэсэн ч жолооч нь газар дээрээ нас барсан юм.

Хэргийн мөрдөн байцаалтын явц болон шархадсан зорчигчдын биеийн байдлыг ЗЦГ-ын Олон нийттэй харилцах албаны дарга С.Энхбатаас тодруулахад, “Талийгаачийн хэн болохыг тогтоож, ар гэрийнхэнд нь мэдэгдсэн. Ослын шалтгааныг тодруулахаар ажиллаж байгаа. Урьдчилсан байдлаар ослын шалтгааныг таамаглаж хэлэх аргагүй юм. Хоёр зорчигчийн амийг аварч, эмнэлэгт хүргээд байсан ч тэдний нэг болох 20 орчим насны залуу шархаа даалгүй өнгөрсөн бямба гаригийн 15.00 цагийн орчим нас барсан” гэв.