Энэ хаврын УИХ-ын нэгдсэн чуулганы хуралдаан маргааш эхэлнэ. Энэ удаагийн УИХ-ын нэгдсэн чуулганаар хэлэлцэх олон чухал асуудал байгаагаас Сонгуулийн тухай хуулийн төслийг хэлэлцэх тов гарсан.
Харин УИХ дахь АН, МАН-ын бүлэг хооронд хийгдсэн тохиролцоо (сонгуулийн холимог системийн талаар) шийдэгдэлгүй УИХ-ын олон удаагийн чуулганы нүүр үзэж байгаа нь улс төрд тулгамдсан асуудлуудын нэг болж байна хэмээн нийслэлийн АН-ын Зөвлөлдөх хорооны XII ээлжит хурлын үеэр нийслэлийн АН-ын дарга Ш.Түвдэндорж хэлсэн.
Сүүлийн үед сонгуулийн системийн талаар олон янзын санаа бодол гарч тэр ч байтугай сонгодог мажоритар буюу 1996 оны сонгуулийн хуулиар явуулах тухай УИХ-ын гишүүд ярьж эхэлжээ. Энэ хаврын чуулганы хэлэлцэх асуудлын тавд уг хуулийг хэлэлцэхээр оруулсан байгаа бөгөөд хэзээ батлагдах нь, мөн аль системээр явагдах нь тодорхойгүй байгаа аж.
Б.Алтансүх