Цагаан металл нэр хүндийн баталгаа

Дэлхийд алт, зэснээс дутахгүй үнэт металл бий. Түүнийг мөнгө гэдэг. Түүхээс үзэхэд зоос цутгалтад мөнгийг алтнаас илүү түгээмэл хэрэглэдэг байжээ. XIX зууны сүүлч хүртэл ихэнх улс мөнгөн зоосыг төлбөрийн нэгж болгон ашиглаж байсан нь түүний “оргил цаг” гэж хэлж болно. Тэгвэл XX, XXI зуунд зоосон мөнгө аажмаар зах зээлээс шахагдах болсон нь өнөөдрийн цаасан дэвсгэртийн нэр нөлөөтэй холбоотой юм. Мөн алтны хойноос дэлхий нийтээрээ хөөцөлдөж эхэлсэн нь мөнгөний стандарт алтанд замаа тавьж өгөх үндэслэл болсон гэхэд хилсдэхгүй. Мөнгийг зоос цутгалтад хэрэглэх нь багассан ч хөрөнгө оруулагчдад зориулсан зарим эргэлтэд ордог зоосыг Америк, Австрали, Канад, Мексик Австри зэрэг орнууд өнөөг хүртэл хэрэглэж байна. Дэлхийд АНУ-ын “Eagle”, Канадын “Маple Leaf”, Австралийн “Phihamoniker” болон “Kookaburra” компаниуд зоос цутгалтаараа дээд амжилт тогтоогоод байна. Өнгөрсөн онд мөнгөний дундаж ханш унци нь 35.33 ам.доллар байсан бол энэ оны дундаж ханш болох унци нь 27.43 ам.долларт хүрээд байна.Энэхүү үнийн гулсалтад алт болон нийт өнгөт металлын үнийн бууралт, зах зээлийн тодорхойгүй байдал гол нөлөө үзүүлсэн аж. Мөнгө богино ба дунд хугацаанд өсөх хандлага ажиглагдахгүй хэмээн шинжээчид үзэж байгаа юм. Мөнгөний ханш уруудсаар буй боловч урьдынхаас чамлахааргүй амжилт үзүүлээд байгаа бөгөөд чансаагаа ахиулсаар.

Ханшийн луужин

Дэлхийн санхүүгийн зах зээлийн уналт нь хөрөнгө оруулагчдыг найдвартай хөрөнгө оруулалт хайхад хүргэснээр цагаан металл ханшийн дээд хэмжээгээ тогтооход хүргэж байна хэмээн шинжээчид үзэх болов. Тиймээс уруудаж явсан мөнгөний үнэ өнгөрсөн нэг жилийн дотор 78 хувиар өсөн нь амжилт байсан гэж олон улсын шинжээчид үзжээ. Цагаан металл цаашдаа өсөлттэй металл хэвээр байх аж. Өөрөөр хэлбэл, мөнгийг хөрөнгө оруулагчид найдвартай, алттай тэнцэх хэмжээний хөрөнгийн баталгаа гэж үзэх болсон нь мөнгөний ханшид сайнаар нөлөөлжээ. Цагаан металлын хэтийн төлвийг авч үзэхэд энэ онд дэлхийн томоохон Төвбанкуудын мөнгөний бодлого их хэмжээгээр чангарахгүй тул энэ нь мөнгөний ханшид нааштай байх аж. Түүнчлэн үйлдвэрлэлийн хэрэглээ нэмэгдэж үнийн байдалд ахиц авчирна хэмээн судлаачид үзэж байна. Мөнгөний дундаж үнэ унци нь энэ онд 33-35 ам.долларт хүрэх бол ирэх онд 35-40 ам.доллар байх таамгийг дэвшүүлээд байна. Товчхондоо, дунд болон урт хугацаанд мөнгөний ханш өсөх хандлагатай хэмээн үзжээ. Өнгөрсөн оны эхний улиралд мөнгөний дундаж үнэ унци нь 32.58 ам.доллар байсан бол энэ оны мөн үетэй харьцуулахад 2.9 хувиар нэмэгджээ. RBS Global Banking “Ирэх онд мөнгөний ханш хэвийн байна. Мөнгөний хэрэглээний өсөлт нь нийлүүлэлтийн өсөлтөө гүйцэж түрүүлнэ” хэмээн тооцжээ.

Хэрэглээ бий юү

Японы хэрэглээ ирэх онд тэлэхээс гадна Хятад, АНУ, Герман ба Өмнөд Солонгос цагаан металлыг сонирхож буй мөнгөний ирээдүйг улам ч баталгаатай болгох аж. Хэдий Энэтхэг улсын хэрэглээ буурсан боловч алдагдалыг нөхөх шинэ зах зээл хаяа дэрлэн бий болж буй нь мөнгөний эрэлтэд сайнаар нөлөөлөх аж. Үйлдвэржсэн ертөнцийн барилгын салбарт хэрэглээ нэлээд буурсан ч цагаан металл харц булаасан хэвээр байх нь. Мөнгө нь бүх металл дотроос хамгийн сайн цахилгаан ба дулаан дамжуулагч металл бөгөөд олон төрлийн цахилгаан хэрэгсэл, ялангуяа цахилгаан дамжуулагч, холболт, гал хамгаалагч зэргээр түүнийг ашигласаар байна.

Мөнгөний олборлолтоор тэргүүлэгч 10 компани: