Европын цуврал тэмцээнүүдэд оролцохоор өнгөрсөн долоо хоногт хилийн дээс алхсан Монголын ширэн бээлийтнүүд Албанийн Шкодёр хотноо болж буй “Мемориал Влажния-2011” тэмцээнээр гараагаа эхлүүллээ. Тэмцээнд Казахтсан, Итали, Монгол, Индонез зэрэг дэлхийн шилдэг багуудаас гадна Македон, Албани, Монтенегро, Словень, Серби, Босния зэрэг 10 орны 46 тамирчин олимпийн наадмын хөтөлбөрт багтсан 10 жингийн ангилалд хүч үзэж байна. Монголын баг тамирчдын тухайд Гавьяат дасгалжуулагч Д.Ганзориг, дасгалжуулагч Р.Сайнбилэг нарын удирдлага дор Албанид хүч үзэж байгаа юм.

Тэмцээний аваргын төлөөх тоглолтууд өнөөдөр болох бөгөөд Монголын гурван ширэн бээлийтэн финалд өрсөлдөх болзлоо хангажээ. Тодруулбал, 52 кг-ын жинд П.Сэрдамба, 56 кг-д Э.Идэрхүү, 64 кг-д У.Мөнх-Эрдэнэ нар “Мемориал Влажния-2011” тэмцээний аваргын төлөө өрсөлдөх юм. Манай бусад тамирчдын тухайд 49 кг-д М.Гандулам, 60 кг-д Б.Жавхлан, 75 кг-д Т.Чулуунтөмөр, +81 кг-ын жинд хүч үзсэн С.Эрдэнэбаяр нар хагас шигшээ тоглолтод ялагдсанаар хүрэл медаль хүртжээ. Харин 69 кг-д Ж.Отгонжаргал, +91 кг-д Д.Идэрбат нар эхний тулаандаа ялагдсанаар тэмцээнээ дуусгасан байна.

Монголын ширэн бээлийтнүүдийн дараагийн тэмцээн нь Польшийн нийслэл Варшав хотноо энэ сарын 5-9-ний хооронд болох юм. Залгуулаад боксчид энэ сарын 20-24-ний өдөр Сербийн нийслэл Бельградад болох “Belgrade Winner” тэмцээнд оролцоно.