Олборлох үйлдвэрлэлийн ил тод байдлын санаачилга / ОҮИТБС /-ын дарга хатагтай Клейр Шорт маргааш Монгол Улсад айлчлахаар болжээ.  Монголын ОҮИТБС- ын Үндэсний зөвлөл, Ажлын хэсгийн урилгаар ирж буй хатагтай Клейр Шорт Монгол Улсад байх хугацаандаа Монгол Улсын Их Хурлын гишүүн, Уул уурхайн сайд, ОҮИТБС- ын Үндэсний зөвлөлийн орлогч дарга Д.Ганхуяг, Ажлын хэсгийн ахлагч Ерөнхий сайдын ахлах зөвлөх Л.Гансүх нартай уулзаж, ОҮИТБС-ыг Монгол Улсад цаашид улам амжилттай хэрэгжүүлэх талаар санал солилцох юм байна.

Уг айлчлалын зорилго нь Монгол Улсад хэрэгжүүлж байгаа ОҮИТБС- ын ололт амжилтыг улам бататгаж, шинэ шатанд гаргах, санаачилгын үр өгөөжийг олон нийт, нутгийн ард түмэнд түлхүү хүргэх, хууль эрх зүйн орчныг боловсронгуй болгоход арга зүйн дэмжлэг үзүүлэхэд оршиж байна. Мөн Шинэчлэлийн Засгийн газрын 2012-2016 онд хэрэгжүүлэх үйл ажиллагааны хөтөлбөрт тусгагдсан ОҮИТБС-ын зарчим стандартыг үргэлжлүүлэн хэрэгжүүлж, хариуцлагатай уул уурхайг хөгжүүлэх, алтны үйлдвэрлэл, хадгалалт, борлуулалт болон тусгай зөвшөөрлийн арилжаанд ил тод байдлыг бүрдүүлэх, эрдэс баялгийн экспортыг “нэг цонх”- ны бодлогоор хэрэгжүүлэхээр заасан зорилтуудыг хэрэгжүүлэхэд тус айлчлал чухал түлхэц болох  тухай албаныхан онцолж байна.