УИХ-ын чуулганы хуралдаанаар 2013 оны төсвийн төслийг хэлэлцэж байгаа энэ үед Хууль зүйн сайд тус яамны харьяа Төрийн тусгай алба хаагчдын эмнэлгийг нураах гэж байна, хуульчдын оффис болгох гэж байна гэсэн мэдээллийг тус эмнэлгийн эмч ажилчид хийж байгаа. Харин Хууль зүйн сайд Х.Тэмүүжин өнөөдөр 2013-2014 онд хууль зүйн салбарт хийгдэх шинэчлэл, өөрчлөлтийг сэтгүүлчдэд танилцуулсан юм. Өнгөрсөн хавар шүүхийн багц хуулиуд батлагдсан. Энэ хуулиудын хэрэгжилтийг хангахын тулд Хууль зүйн яам бол мэргэжлийнхээ түвшинд оролцож, иргэний үндсэн эрхийг баталгаажуулах чиглэлээр эрхзүйн томоохон шинэтгэлийг эхлүүлэх гэж байна. Хууль зүйн нэгдсэн бодлогыг бий болгох, хууль тогтоомжуудыг өөр өөрийнхөөрөө дураараа бичдэгийг зогсоож, нэр томъёо, үг хэллэг ойлголтууд зөрүүдтэй байдлыг өөрчлөхийн тулд Хуулийн тухай хуулийг боловсруулж байгаа аж. Ингэснээр хуулийн хийдэл, давхардал арилах юм.

Мөн гэмт хэргээс урьдчилан сэргийлэх, гэмт хэрэгтэй тэмцэх механизмыг сайжруулах зорилгоор томоохон дэд бүтцийг бий болгох гэнэ. Үүн дотороо авилга, хүнд хүний наймаа, хар тамхи, мөнгө угаах, экологийн гэмт хэрэгтэй тэмцэх дэд бүтэц буюу мөрдөх албыг тусад нь байгуулах юм байна. Харин шүүх одоогийнх шиг засаг захиргааны нэгжид тулгуурлан дүүрэг дүүрэг дээр биш, тойргын зохион байгуулалтад орох гэнэ. Тодруулбал, зургаан дүүргийн шүүхийг нэгтгэж, хоёр том шүүхийг нийслэлийн хэмжээнд байгуулах аж.

Шүүх байгууллагын шинэчлэлтэй холбоотойгоор шийдвэр гүйцэтгэлийн алба ч бас өөрчлөгдөх гэнэ. Өнөөдөр 7000 гаруй хоригдлыг 200-300-гаар нь 23 хорих байранд хорьж байгаа. Хорих ангиудын жилийн төсөв 24 тэрбум гаруй төгрөгт хүрсэн ч нэг ялтанд ноогдох харгалзагчийн тоо хүрэлцээгүй байгаа аж. Стандартаар бол нэг харгалзагч 20 хоргдлыг хянах ёстой атал өнөөдөр нэг харгалзагчид 80 хоригдол ноогдож байгаа. Хорих ангиудын зардал барилга байшин, захиргааны бүтфээ санхүүжүүлэхэд явчихаад яг хоригдолтой ажилладаг хянагчид нь хүрэлцдэггүй байна. Тиймээс улсын хэмжээний төвлөрсөн хорих ангиудыг нэгтгэн 1000-1500 хоригдолтой 5-6 том хорих анги байгуулбал зардал багасч, хянагчдынхаа орон тоог нэмэх боломжтой юм. Ингэвэл одоогийн 23 ангийг хяналтын камераар хангах зардлаас зургаан том хорихыг хяналтын камераар хангах зардал гурав дахин бага тусах юм байна. Харин урсгал зардал бол тав дахин буурна гэдгийг сайд хэллээ.