Шашны үзэл суртлыг гутаан доромжилж, ерөнхийлөгч Владимир Путиныг эсэргүүцсэн хэргээр хорих ял сонссон Оросын панк рок хамтлаг “Pussy Riot” хамтлагийн нэг гишүүнийг суллах шийдвэрийг Москвагийн шүүхээс гаргажээ. Тэр нь хамтлагийн гишүүн, 30 настай Екатерина Самуцевич гэнэ.

Нийгмийн ёс зүйгүй авир гаргасан хэргээр ял сонссон тус хамтлагийн хэрэг өнгөрсөн наймдугаар сард ОХУ-д төдийгүй олон улсын тавцанд шуугиан тарьсан юм. Хорих ял оноосныг эсэргүүцсэн хэд хэдэн жагсаал Москвад өрнөж, олон улсын хүний эрхийн байгууллагууд ч эсэргүүцэл илэрхийлж байв. Харин хамтлагийн нэг гишүүнийг суллах болсон шалтгаан нь өчигдөр Москвагийн шүүхэд Самуцевичийн өмгөөлөгчийн хийсэн тайлбартай холбоотой аж. Тэрбээр “Pussy Riot” хамтлаг Москвагийн гол сүмд танхайрах үед Екатерина Самуцевич голлох үүрэг гүйцэтгээгүй, зөвхөн баг зүүж, гитар тоглосноос өөр зүйл хийгээгүй хэмээн мэдүүлсэн байна.