Хууль зүй, дотоод хэргийн яам, Цагдаагийн Ерөнхий газраас зохиож буй “Аюулгүй, амар тайван орчин” аяны хүрээнд “Green Friday” буюу архи, тамхигүй баасан гариг үдэшлэгийг Монгол Улсын Ерөнхийлөгчийн Тамгын газар, Эрүүл мэндийг дэмжих сан, “My Club” ТББ-тай хамтран шөнийн цэнгээний METROPOLIS night клубт өчигдөр зохион байгууллаа.
Дуучин Д.Болд, Маралжингоо, BX нар ая дуугаа өргөсөн энэ үдэшлэгийн үеэр алкоголгүй коктейлийг сурталчилж,  бартендерийн шоу үзүүлбэр, DJ, MC нарын хөгжмийн хэмнэлд залуус бүжжээ.
Архи, тамхигүй анхны үдэшлэгийг хүндэтгэж, Эрүүл мэндийн сайд С.Ламбаа, Хууль зүй, дотоод хэргийн дэд сайд В.Удвал, тус яамны Бодлогын хэрэгжилтийг зохицуулах газрын дарга Т.Алтангэрэл, Цагдаагийн Ерөнхий газрын Олон нийттэй харилцах хэлтсийн дарга, хурандаа Т.Сайнжаргал нар хүрэлцэн ирсэн байв. Эрүүл, эерэг амьдралын хэв маягийг залууст сурталчлах, эрүүл, хүчирхэг монгол залуу хүний шинэ имижийг дэмжих, залуусын ухамсарт архи, тамхигүй баярлаж болдгийг таниулах, аюулгүй, амар тайван орчин бүрдүүлэхэд чухал ач холбогдолтой үдэшлэг боллоо гэж зохион байгуулагчид дүгнэлээ.

Н.Түвшин