УИХ-ын Сонгуулийн тухай хуулийг батлалгүй удаашруулж байгаа нь эмэгтэйчүүдэд халтай байгаа аж. Ардчилсан эмэгтэйчүүдийн холбооны тэргүүн Ц.Оюунгэрэл ингэж хэлж байна. Эмэгтэйчүүд сонгуульд нэр дэвшин оролцохын тулд санхүүжилтээ босгох нь хамгийн хүнд асуудал байдаг. Гэтэл Сонгуулийн хуулийг ямар тогтолцоогоор батлах нь тодорхойгүй, эмэгтэй нэр дэвшигчдэд квот өгөх эсэх нь ч мэдэгдэхгүй удаж байгаагаас бүсгүйчүүд хүлээлтийн байдалд оржээ. Хэрэв хуулийн орчин тодорхой болбол эртнээс хөрөнгө босгох ажилд орох шаардлагатай байгааг тэрбээр хэлж байв. “Эмэгтэйчүүд хөрөнгө босгоход эрчүүдээс хавьгүй удаан цаг хугацаа, хүч шаарддаг тул одооноос нэр дэвших эсэхээ мэдэж бэлтгэх хэрэгтэй байна” гэж Ц.Оюунгэрэл хэллээ.