УИХ-ын гишүүн Ц.Цолмон МҮАН-аас гарч, МАХН-д элсэх шийдвэрийг уржигдар гар­гасан. Тэрбээр өөрийнхөө шийдвэрт сэтгэл хангалуун бай­гаагаа илэрхийлсэн ч намынхаа нөхдийг цочролд оруул­чихсан. Шинэ намынхан нь бус МҮАН-ынхан хэлэх үг­гүй болтлоо гацчихсан гэж болно. Яг л хоолой дээр нь яс тээглэсэн мэт. Тийм ч учраас МҮАН-ын удирдлагууд өнөөд­рийг хүртэл тодорхой байр суурь илэрхийлээгүй бөгөөд зөвхөн Ц.Цолмон гэсэн хувь улстөрчийн байр суурь л хэв­лэлийг чимж байна. “Би МАХН-д жирийн гишүүнээр эл­сэж байгаа. Энэ шийдвэрийг гар­гахын тулд олон хүнтэй зөвлөлдсөн. Олон талаас нь бодсон. Яг шийдвэр гаргахад нөлөөлөөгүй ч, миний гаргаж байгаа шийдвэр буруу биш гэд­гийг харуулах үзүүлэлт бий.

Манай арав төгссөн ангийнхан, сүүлд намын дээд сургууль төгсөхөд байсан ангийнхан, ах дүү нарын олонхи нь МАХН-д бий. Тэгэхээр би улс төрийн хувьд алдаж магадгүй” гэсэн үгс. Түүний энэ үг улстөрчийн байр суурь бус хувь хүний хүсэл сонирхол юм гэсэн. Мэдээж өөрийнх нь тайлбарлаж байгаагаар бол сайхан л байр суурь.

Харин намынхных нь хувьд ёстой л далаараа тавиулна гэдэг шиг байдалд орчихоод байгаа. УИХ-ын гишүүн Г.Уянга л гэхэд  Ц.Цолмон гишүүний шийдвэрийг сонсоод шоконд орсон гэдгээ нуугаагүй. Намынх нь дарга М.Энхсайхан ч түүнээс дээр нөхцөл байдалд ороогүй байх. Гэхдээ Ц.Цолмон гишүүн энэ тухайгаа даргадаа өмнө нь хэлсэн гэдгээ хэвлэлээр мэдэгдсэн. Гол нь энэ бүхэн бол МҮАН-ын дотоод асуудал.

Тэгвэл Ц.Цолмон гишүүний гэнэтийн шийдвэр зөвхөн МҮАН-ын асуудлаас хальж, “Шударга ёс” эвслийн хувь заяатай холбогдох нь тодорхой болж байна. Цаашлаад Ц.Цолмон гэдэг УИХ-ын гишүүн байх шаардлагатай эсэхийг ярих хэрэгцээ шаардлагыг ч бий болгочихлоо. Ц.Цолмон гишүүний хувьд сонгогчдын саналаар сонгогдоогүй. “Шударга ёс” эвслийн жагсаалтаар УИХ-д орсон. Жагсаалтад орохдоо МҮАН-д хуваарилагдсан суудлын хуваарилалтаар гишүүн болсон. Тэгэхээр УИХ-ын гишүүнийх нь суудал шууд утгаараа МҮАН-ын өмч байх ёстой бөгөөд тухайн нам өөрийн квотдоо өөрийн намын хүнийг л гишүүн болгох давуу эрхтэй юм. Нэг ёсны Ц.Цолмон гишүүн МҮАН-аас гарч, МАХН-д элссэнээр УИХ-ын гишүүнийхээ бүрэн эрхээс татгалзаж, сул гишүүний үүрэг гүйцэтгэх шаардлагатай болно гэсэн үг. Өөрөө ч энэ тухайгаа гадарлаж байгаа бололтой юм билээ. Учир нь “Би улс төрийн хувьд алдаж магадгүй. Энд тэндээс хөөгдөж, хасагдахыг ч үгүйсгэхгүй. Гэвч миний  шийдвэр буруу биш гэдэгт итгэлтэй байгаа” гэсэн өгүүлбэрийг өөрийнхөө амнаас унагасан байсан. Түүнчлэн МҮАН-ын гишүүд ч “УИХ-ын гишүүн байх эсэхийг нь ярилцах хэрэгтэй” гэсэн яриаг дотроо сэм ярилцаад эхэлсэн нь нууц биш юм. Мэдээж МАХН-ын зүгээс “Ц.Цолмонг УИХ-ын гишүүнээс нь түдгэлзүүлсэн тохиолдолд эвслийг тараана” гэж айлгахгүй л бол шүү дээ. Эцэст нь түүний тухай сонирхолтой мэдээллийг дуулгахад Ц.Цолмон гишүүн тэртээ 1990-ээд оны үед МАХН-аас элэг буруулснаасаа хойш 20 орчим жилийн хугацаанд таван намын хаалгыг хааж, нээж явсныхаа эцэст төрхөмдөө эргэн ирж байгаа нь энэ. Бууринаасаа хөдөлсөн чулуу гурван жил зовно гэдэг шиг л…