Уул уурхайн салбарт хөгжлөөрөө тэргүүлж буй Австрали улстай уул уурхайн салбар дахь хамтын ажиллагаагаа гүнзгийрүүлэх талаар өчигдөр Ерөнхийлөгч Ц.Элбэгдорж тус улсын Гадаад хэргийн сайдтай ярилцлаа. Австралийн Гадаад хэргийн сайд Боб Каррын мэдэгдэж буйгаар Монголд тогтвортой, байгаль орчинд ээлтэй уул уурхайн салбарыг хөгжүүлэхэд Австралийн хувь нэмэр их байх боломжтой ажээ. Тэрбээр мөн Монгол улс нь уул уурхайн салбарын үсрэнгүй хөгжлийн шат руугаа явж буй ч, байгаль орчноо сүйтгэхгүй байхад нь манай улсын туршлага хэрэгтэй гэж тайлбарлажээ.

Австралийн хувьд Монгол улс нь Хятадын коксжих нүүрсний импортын зах зээлийн тухайд томоохон өрсөлдөгч нь болоод буй юм. Олон улсын зарим шинжээчийн тайлбарлаж буйгаар Монгол улс нь Хятадын эрдсийн зах зээлд томоохон байр суурь эзлэх тусам Австралийн эрдсийн экспортын үнэ буурах магадлалтай ажээ. Гэвч энэ тухайд Австралийн Гадаад хэргийн сайд Монголыг өрсөлдөгч бус, харин тэдэнд салбарын зөв хөгжлийг бүрдүүлэхэд нь туслах ёстой гэж өчигдөр орой Австралийн үндэсний телевизэд өгсөн ярилцлагадаа дурджээ.

Одоогийн байдлаар Австралийн 54 компани Монголын уул уурхайн салбарт үйл ажиллагаагаа явуулж буй ажээ. 

Австрали улсын хувьд Монголын Ашигт малтмалын тухай хууль болон Өмнийн говийн газрын гүний усны менежментийг сайжруулах тухайд туслалцаа үзүүлж хамтран ажиллаж буй юм.

Б.Төгс

www.mongolianminingjournal.com
www.journalism.mn