Өнөөдөр Булган, Сэлэнгэ, Төв аймгийн нутгаар нойтон цас орж, хөрсөн дээр цочир хүйтрэхийг Цаг уур, орчны шинжилгээний газраас онцгойлон анхааруулж байна.

Урьдчилсан мэдээллээр бол өнөөдрөөс эхлэн цаг агаар сүүлийн өдрүүдийн дундаж температураас 10 хэмээр буурах аж. Хүйтэрч, салхины хурд ихсэх тул зарим орон нутгийн нислэгүүд хойшлогдох магадлалтайг Цаг уур, орчны шинжилгээний газрынхан анхааруулж байна.

Хүйтний улирлын эхэн үед их хэмжээний нойтон цас орсны улмаас 2009, 2011 оны есдүгээр сард тариа, ногоо цасанд дарагдаж,  Дархан чиглэлийн өндөр хүчдэлийн шугам гэмтэн, багагүй хэмжээний осол гарч байжээ. Энэ зуны хувьд манай орны газар тариалангийн бүс нутгуудаар бороо хур ихтэй байсан ч дулааны баланс алдагдсанаас тарианы болц удааширч, ургац хураалт төлөвлөсөн хоногоос оройтож эхэлсэн нь хөдөө аж ахуйн салбарынхны санааг зовоож буй асуудлын нэг болоод байгаа билээ.

БАРУУН АЙМГУУДЫН НУТГААР: Үүлшинэ. Шөнөдөө хур тунадас орохгүй. Өдөртөө нутгийн баруун хэсгээр хур тунадас орно. Салхи баруун өмнөөс секундэд 5-10 метр. Алтай, Хангайн уулархаг нутгаар шөнөдөө 3-8 градус хүйтэн, өдөртөө 6-11 градус, Алтайн өвөр говиор шөнөдөө 1-6 градус, өдөртөө 15-20 градус дулаан, бусад нутгаар шөнөдөө 3 градус хүйтнээс 2 градус дулаан, өдөртөө 10-15 градус дулаан байна.

ТӨВИЙН АЙМГУУДЫН НУТГААР: Үүлшинэ. Ихэнх нутгаар хур тунадас орно. Салхи баруун хойноос секундэд 6-11 метр. Хангай, Хөвсгөлийн уулархаг нутгаар шөнөдөө 3-8 градус хүйтэн, өдөртөө 1-6 градус дулаан, бусад нутгаар шөнөдөө 3 градус хүйтнээс 2 градус дулаан, өдөртөө хүйтэрч 6-11 градус дулаан байна.

ЗҮҮН АЙМГУУДЫН НУТГААР: Үүлшинэ. Шөнөдөө хур тунадас орохгүй. Өдөртөө зарим газраар хур тунадас орно. Салхи өмнөөс хойш эргэж секундэд 5-10 метр, өдөртөө зарим газраар секундэд 12-14 метр хүрч ширүүснэ. Шөнөдөө 1-6 градус, өдөртөө Хэнтийн нутгаар 10-15 градус, бусад нутгаар 15-20 градус дулаан байна.

ОТРЫН НУТАГ ХЭРЛЭНБАЯН-УЛААН ОРЧМООР: Үүлшинэ. Хур тунадас  орохгүй. Салхи баруун хойноос секундэд 5-10 метр. Шөнөдөө 0-2 градус, өдөртөө 16-18 градус дулаан байна.

ГОВИЙН АЙМГУУДЫН НУТГААР: Үүлшинэ. Хур тунадас орохгүй. Салхи баруунаас секундэд 5-10 метр, зарим газраар секундэд 12-14 метр хүрч ширүүснэ.

Дундговийн нутгаар шөнөдөө 1 градус хүйтнээс 4 градус дулаан, өдөртөө 10-15 градус, бусад нутгаар шөнөдөө 4-9 градус, өдөртөө 16-21 градус дулаан байна.

УЛААНБААТАР ХОТ: Үүлшинэ. Хур тунадас орно. Салхи баруун хойноос секундэд 5-10 метр. Шөнөдөө 0-2 градус, өдөртөө хүйтэрч 6-8 градус дулаан байна.