Өмнөговь
аймгийн Засаг даргын тамгын газраас санаачлан, тус аймгийн нийт 15
сумын малчдын төлөөллийг оролцуулсан Сайн малчдын анхдугаар зөвлөгөөнийг
өнгөрөгч долоо хоногт зохион байгуулжээ. Уул уурхайтай хаяа залган
амьдарч байгаа говийн малчдын хувьд салбарын хөгжилтэй хоршин уламжлалт
мал аж ахуйгаа хадгалан авч үлдэх, хөгжүүлэх чиглэлд санал хэлэлцэх
шаардлагатай асуудлууд олон бий. Энэ утгаараа зөвлөгөөний үеэр малчдын
эрүүл мэнд, нийгмийн хамгааллын асуудал, эрчимжсэн мал аж ахуйг
хөгжүүлэх боломжууд болон уул уурхайтай хорших замаар үр дүнтэй хамтын
хөгжлийг бий болгох тухайд санал солилцож, зөвлөмж гаргасан байна. Гол
нь уул уурхайн үйл ажиллагаа нутгийн иргэдэд ээлтэй, харилцан ойлголцол,
хамтын ажиллагааны зарчимд тулгуурлаж, нээлттэй явагдах ёстой гэдгийг
хэлэлцүүлэгт оролцсон төлөөлөгчид онцолж байжээ.

Зохион
байгуулагчдын зүгээс тэрчлэн малчдад уул уурхайн талаарх бодитой
мэдээлэл олгох үүднээс Ханбогд суманд хэрэгжиж буй Оюутолгой төсөл болон
Цогтцэций суманд хэрэгжиж байгаа Ухаа Худаг төслүүдийн үйл ажиллагаатай
танилцах аяллыг зохион байгуулсан байна. 4 дэх жилдээ хэрэгжиж байгаа
Ухаа Худаг төслийн тухайд уурхай дагасан дэд бүтэц, нийгмийн хөгжлийн
асуудлыг жишээ болохуйц түвшинд шийдэж чадсанаараа төлөөлөгчдийн
анхаарлыг татаж байлаа. Төслийг хэрэгжүүлэгч Энержи Ресурс компанийн
үндсэн ажиллагсдын тоо 2,400 гаруйд хүрсний 40 орчим хувьд орон нутгийн
иргэд ажиллаж байгаа төдийгүй Ухаа Худагийн нийт бүтээн байгуулалтад
дотоодын 700 гаруй аж ахуйн нэгжийн 8,000 гаруй хүний хүч хөдөлмөр
шингэсэн байна. Энэхүү  өргөн цараатай бүтээн байгуулалтыг дагасан хүн
ам, нийгмийн асуудлыг цогцоор шийдэхийн тулд компанийн зүгээс Цэций
нэртэй орчин үеийн хорооллыг байгуулж, уурхайчдын тав тухтай шилжин
суурьших нөхцлийг бүрдүүлжээ. Хороолол дагасан спорт цогцолбор,
үйлчилгээний төв, бага сургууль, цэцэрлэг зэргийг хурдан хугацаанд барьж
ашиглалтад оруулснаас гадна сумын иргэдийг байнгын гэрэл цахилгаан,
ундны цэвэр усаар хангаж байгаа зэрэг нь Цогтцэций суманд ирээдүйн
томоохон хот босох эхлэлийг хэдийн тавьжээ. Цаашлаад Энержи Ресурс ХХК
болон аймаг, орон нутгийн хамтын хөрөнгө оруулалттайгаар 650 хүүхдийн
сургууль, 140 хүүхдийн цэцэрлэг, 100 хүүхдийн дотуур байр бүхий
боловсролын иж бүрэн цогцолбор шинээр баригдсан нь энэ ондоо багтан
ашиглалтад орох юм байна.

Баян-Овоо сумын малчин Д.Хүүхэнхүү:

Говь
нутагт ажил хөдөлмөр, ололт амжилт их байгааг өөрийн нүдээр үзэж,
сэтгэл өндөр байна. Ялангуяа нөхөн сэргээлтэнд анхаарч, ойн зурвас,
газар тариалангийн талбайг хүртэл хөгжүүлсэн нь их санаа авууштай, зөв
ажил байна. Бас ажилчдынхаа ахуй амьжиргааг тал талаас нь анхаарч, орон
сууцны хороолол, барилга байшин бүгдийг шийдсэн нь их сайхан ажил
болжээ. Ер нь орчин цагт Монгол Улсад өрнөсөн бүтээн байгуулалтуудын
оргил нь юм уу гэж би хувьдаа ойлгож байна.

Номгон сумын малчин Ж.Энэбиш:

Монголчууд
маань юм хийж сурч байгаа юм байна, манай улсын ирээдүй гэгээлэг байгаа
юм байна гэдгийг мэдэрлээ. Ухаа Худагт ирээд хамгийн орчин үеийн
барилга байгууламжуудаас аваад монголчуудын босгосон цахилгаан станцыг
хүртэл харлаа. Их өндөр түвшинд хийгдсэн, Өмнөговийн ирээдүйд үлдэцтэй,
даацтай бүтээн босголтууд энд байдаг юм байна.