Сүхбаатар дүүргийн 35 дугаар сургууль Улсын математикийн олимпиадын 1990 оны мөнгөн медальт, УИХ-ын гишүүн Л.Гантөмөрийн нэрэмжит “Стандарт 2011” математикийн уралдааныг дүүргийн хэмжээнд долоо дахь удаагаа зохион байгуулжээ. Энэ жилийн “Стандарт 2011” уралдаанд дүүргийн бүх сургуулиудийн 1-11 дугээр ангийн 1537 сурагч оролцож, 48 сурагч медальт байранд оржээ. Уралдаанаас “Орчлон” сургуулийн сурагчид зургаан алт, дөрвөн мөнгө, гурван хүрэл медаль авч сургуулиараа тэргүүн байр, Лаборатори нэгдүгээр сургууль гурван алт, дөрвөн мөнгө, зургаан хүрэл медаль авч дэд байр, “Хобби” сургууль нэг мөнгө, хоёр хүрэл медаль авч гуравдугаар байрт шалгарч, уг уралдааныг ивээн тэтгэсэн УИХ-ын гишүүн Л.Гантөмөр шагналыг гардууллаа. “Стандарт 2011” уралдааны зорилго нь математикийн гүнзгийрүүлсэн болон олимпиадын сургалт явуулдаггүй энгийн сургуулиудыг ялгалгүй, бүх сурагчдыг математикт сонирхолтой болгох, сургуулиудын сургалтын стандартыг дээшлүүлэх зорилготой аж. Сүхбаатар дүүргийн хэмжээнд долоо дахь удаагаа зохион байгуулж байгаа “Стандарт 2011” математикийн уралдааныг энэ жил “Математикийн багш нарын холбоо”-ноос дэмжин, нийслэлийн бусад дүүргүүдэд нэгэн зэрэг зохион байгуулсан байна. Тиймээс удахгүй “Стандарт 2011” нийслэлийн уралдааныг зохион байгуулахаар бэлтгэл ажлыг эхлээд байгаа аж.
Б.ГАЛ