Тээвэр хөгжлийн банкны гүйцэтгэх захирал асан А.Е.Новожилов эрүүгийн хэрэгт татагдан Чингэлтэй дүүргийн  анхан  шатны шүүхээс оргон зайлснаас хойш тус банктай холбоотой мэдээлэл олон нийтийн анхаарал татах болсон. Харин хувь нийлүүлэгч Армин Виедеркер нь “Инфрастракчер” ББСБ ХХК-нд хөрөнгө оруулан, “Тээвэр хөгжлийн банкны дүрмийн санг нэмэгдүүлэх тухай” гэрээ байгуулж, 2006 оны арваннэгдүгээр сарын 8-ны өдрөөс Тээвэр хөгжлийн  банкны 51 хувийн хувьцаа эзэмшигч болж байжээ. Харин А.Е.Новожиловын хэрэгт Армин Виедеркер холбоотой байж магадгүй гэсэн мэдээлэл тархаад байгаа юм. Түүнчлэн тус банкийг тойрсон янз бүрийн мэдээлэл сүүлийн үед гарах болсон. Тухайлбал, хувьцаа эзэмшигчдийн хурлыг нууцаар явуулж, тэдний эрх ашгийг хөндөж байна, удахгүй дампуурах гэж байна гэх мэт мэдээлэл. Харин үүнд тус банкны хувьцаа эзэмшигч, ТУЗ-ийн дарга Д.Энхтайван, тус банкны хуулийн ажилтан Батзаяа нар “Монгол ньюс” мэдээллийн төвд өнөөдөр хэвлэлийн бага хурал зарлаж дээрх мэдээллийг няцаав. Харин эдгээр мэдээллийг тарааж, олон нийтийн дунд банкны нэр хүндийг унагаахаар ажиллаж буй Р.Батрагчаа нь Тээвэр хөгжлийн банкийг бүрэн төлөөлөх чадваргүй этгээд гэв. Р.Батрагчаа нь эрүүгийн хэрэгт холбогдсон гадаадын этгээдийг “Оюуны ундраа” группын захиалгаар хаацайлан өмгөөлж байгаа юм хэмээн тэд ярилаа.