“Бага чулуугаар их чулуу доргионо” гэж үг байдаг. Тэгвэл говийн бүсэд өрнөх их бүтээн байгуулалтын далбаан дор бизнесийн жижиг салбаруудыг хөгжүүлэх зорилго тавьж буйгаа холбогдох албаныхан мэдээллээ. Сайншандын аж үйлдвэрийн цогцолбор, Тавантолгойн төмөр зам гээд том ажлуудын чиглэл нэгэнт тодорхой болсон. Харин энэ бүхэнтэй зэрэгцэн урагшлах учиртай үйлдвэрлэл, үйлчилгээний бусад салбарын хөгжилд хөрөнгө оруулалт шаардлагатай байгаа юм. Тиймээс тухайн бүс нутгийн удирдлага,  холбогдох яам, газруудтай хамтран гадаад, дотоодын хөрөнгө оруулалт татах зорилго бүхий чуулга уулзалтыг ирэх сарын 15-нд зохион байгуулахаар болжээ. Энэхүү чуулга уулзалт нь дээрх зорилгоос гадна Сайншандын аж үйлдвэрийн цогцолбор болон Тавантолгой-Зүүнбаян-Сайншандын чиглэлийн төмөр зам, Замын-Үүдийн эдийн засгийн чөлөөт бүс, Ханги хилийн боомтын үйл ажиллагааг сурталчлах, мэдээлэл өгөх зорилготой аж.

Одоогийн байдлаар Сайншандын аж үйлдвэрийн цогцолборын судалгааны ерөнхий зөвлөх компани шалгарч, гэрээнд гарын үсэг зурахад бэлэн болоод байгаа. Судалгааны баг тайлангаа зургаан сарын дотор бэлтгэж, хүлээлгэн өгөх учиртай. Үүнтэй холбогдуулан аж үйлдвэрийн цогцолбор болон төмөр замын бүтээн байгуулалттай холбогдсон харил­цаа, Дорноговь аймгийн жи­жиг, дунд үйлдвэрлэлийн талаар бодит мэдээлэл өгөх зайлшгүй шаард­ла­гатай болсон байна. Гэхдээ хөрөн­гө оруулагчдын чуулга уулзалт нь том төслүүд гэхээсээ илүү дагалт үйлчилгээг хөгжүүлэх чиглэлд түлхүү анхаарна. Тухайлбал, барилгын компаниудад цэцэрлэг, сургуулиас эхлээд гүйцэтгэх ажил мундахгүй аж. Ойрын жилүүдэд улсын хэмжээнд бүтээн байгуулалтын 26 том төсөл хэрэгжүүлэх жагсаалт гаргачихсан байгаа. Үүнээс 11 ажил нь Дорноговь аймагт өрнөх юм. Энэ утгаараа дорнын говьд хүн амын төвлөрөл, ажлын байр нэмэгдэх нь ойлгомжтой. Зөвхөн Сайншандын бүтээн байгуулалтад л гэхэд эхний ээлжинд 30 мянган ажлын байр шинээр бий болох тооцоо бий. Мөн аж үйлдвэрийн цогцолборыг бүрэн байгуулж дуусахад энэ тоо 300 мянга болж өсөх юм. Тиймээс үндсэн бүтээн байгуулалтаас гадна хүнс, орон сууцны хангамж, боловсрол, соёлын үйлчилгээг шийдэх зайлшгүй шаардлагатай болно. Энэ нь өөрөө жижиг, дунд бизнес хөгжих асар том боломж юм. Аймгийн удирдлага орон нутгаа хөгжүүлэх энэ орон зайг бусдад зүгээр нэг тавиад өгчихгүй. Гахай, шувууны аж ахуй гэх мэт жижиг, дунд хэмжээний төслүүдийг бизнесийн байгууллагуудтайгаа хамтран бо­ловсруу­лаад эхэлчихсэн. Харин энэ бүхэнд хөрөнгө оруулалт татах юм. Гэхдээ  хөрөнгө  оруулагчдад таатай нөх­цөл бүрдүүлэхийн тулд ус, эрчим хүчний хангамжийг аймгийн төсвөөр шийднэ гэдгээ тэд хэллээ.

Өчигдөр болсон хэвлэлийн бага хурлын үеэр Дорноговь аймгийн Засаг дарга П.Ганхуягаас зарим зүйлийг тодрууллаа.

-Та бүхэн гадаадын хөрөнгө оруулалт татах бэлтгэлээ хэр хангасан бэ?

-Бид юун түрүүнд ямар ямар ажилд хөрөнгө оруулах боломж байгааг дэлгэрэнгүй танилцуулна. Холбогдох тооцоо судалгааг нарийвчлаад хийчихсэн ажил ч олон байгаа. Үүнээс гадна орон нутгийн удирдлага төрийн үйлчилгээний хувьд хөрөнгө оруулагчдад аль болох хүндрэл учруулахгүй байх тал дээр анхаарч байгаа. Мөн энэ их бүтээн байгуулалтын бэлтгэлийг хангахын тулд Дорноговь аймгийн иргэд дарга, цэрэг гэлтгүй бүгд хүчин зүтгэх болно.

-Замын-Үүдэд чөлөөт бүс хөгжүүлэх тухай яриад олон жилийг үдлээ. Энэ ажлын явц ямар байна вэ?

-Том бүтээн байгуулалтуудтай зэрэгцээд олон ажил урагшлах төлөвтэй байна. Ер нь бид хилийн гол боомт гэдэг утгаар нь Замын-Үүдийн хөгжилд түлхүү анхаарна. БНХАУ-аас манай улсад олгосон 300 сая ам.долларын зээлээс 50 саяыг нь энэ боомтын дэд бүтцэд зориулж байгаа. Эдийн засгийн чөлөөт бүсийн ажлыг одоо улам эрчимжүүлнэ.

-Одоо яаралтай санхүүжилт шаардлагатай ямар ажлууд байна?

-Чойроос Замын-Үүд хүртэлх босоо тэнхлэгийн замын бүх санхүүжилтийг шийдсэн. Энэ ондоо багтаад замын 50 хувийг нь ашиглалтад өгөх боломжтой. Ерөнхийдөө томоохон дэд бүтцийн хөтөлбөрүүдэд хүндрэл гарахгүй байх. Харин энэ бүхэнтэй зэрэгцүүлж хөгжүүлэх шаардлагатай дагалдах үйлдвэрлэл, үйлчилгээнүүдэд хөрөнгө оруулалт хэрэгтэй байна. Тийм учраас бид “Хөгжлийн бүс-Дорноговь” хөрөнгө оруулалтын чуулганыг орон нутагтаа зохион байгуулахаар шийдвэрлэсэн.

Зохиогчийн эрх:
"Улс төрийн тойм" сонин