Уругвай улсын Монтевидео хотын Шератон зочид буудалд болсон нэгэн хэвлэлийн бага хурлын үеэр испанийн хөгжмийн зохиолч Хоакин Савина ширхэг янжуур асаан татсны улмаас тус зочид буудал тамхи татах боломж олгосон гэсэн зэмлэл хүлээж, 11 мянган долларын торгууль төлөхөөр болжээ. Уругвай улсад олон нийтийн байр талбайд тамхи татахыг эрс хориглосон хатуу хууль тогтоомж үйлчилдэг ажээ.

Уругвай улсын Эрүүл мэндийн сайд “Хөгжимчин Савина бус Шератон зочид буудлыг буруутан гэж үзэж байгаа юм. Эрүүл мэндийн яам тамхинд донтогсдыг бус тамхи татах боломж олгож, хууль зөрчсөн байгууллага, хүмүүсийг торгодог юм” гэж мэдэгджээ.

Хэвлэлийн хурал хийлгэж байсан хөгжимчин Савина  ямар ч санаа зовсон шинжгүй янжуур асаан татаж эхлэхэд хэвлэлийн бага хуралд оролцож байсан сэтгүүлчид улс оронд олон нийтийн байранд тамхи татахыг хориглосон хатуу хууль үйлчилж байдгийг түүнд сануулсан байна. Гэвч хөгжимчин сануулгыг үл хайхран тамхиа үргэлжлүүлэн татжээ. Түүгээр ч зогсохгүй инээд алдан “Авсанд орсон ч гэсэн тамхиа барьсаар л байх болно” гээд инээд наргиан болгосон ажээ.