Энэ жилийн хөрөнгө оруулалт бүтээн байгуулалтын ажлын эцсийн үр дүн нь  хийсэн ажилд иргэд сэтгэл хангалуун байх явдал гэдгийг хотын дарга онцолж байна. Нийслэлийн хөрөнгө оруулалтын газраас 2011 онд хийгдэх хөрөнгө оруулалт, бүтээн байгууллалтын ажлуудын талаар аж ахуйн нэгж, компаниудыг урьж хийсэн нээлттэй мэдээлэл дээр хэлсэн үгэндээ тэрбээр ийнхүү онцлов. Өнгөрсөн жил хотын дарга хөрөнгө оруулалтаар өгсөн нэг төгрөг бүрийнхээ хойноос нэхэж, чанартай гүйцэтгэл шаардаж ажилласны дүнд хийсэн ажилдаа иргэдээс ч, нийслэлийн парламентаас ч бүрэн хангалттай үнэлгээ авсан. Өнөө жил ч хөрөнгө оруулалтын ажилд баримтлах зарчим адилхан байх агаад гагцхүү захиалагч, гүйцэтгэгч нарын итгэлцлийг цаашид улам сайжруулж, иргэдийн сэтгэл ханамжийн баталгааг дээшлүүлэх нь чухал гэж үзэж байгаа юм. 

 “Жилээс жилд хийх ажил ихсэнэ. Үүний хэрээр иргэдийн тавих шаардлага ч өндөрсөнө. Хотоос хийгдэх ажлууд дээр оролцоход хэн нэг хүнээр дамжсан эдийн засгийн хөшүүрэг хэрэглэх шаардлагагүй шүү. Хэрэв хэн нэг нь ийм байдал гаргавал шууд хотын даргад нэр усаар нь хэлээд ороод ирээрэй. Ингэж ажиллаж байж бид иргэдийн энгийн атлаа хатуу шаардлагыг хангана. Хот ажил гүйцэтгэгч нараа аль болох дэмжинэ. Харин ажил аваад бусдыг хохироосон зүйл хийвэл зам замаа л харна шүү” гэдгийг хотын дарга хэлсэн. Хот өөрөө том баталгаа болох учир хотоос зарлаж буй тендерүүд дээр банкууд ч мөн адил хамтран тодорхой ажил хийнэ гэдэгт итгэж буйгаа ч уламжилсан.

Энэ жил нийслэлд хийгдэх томоохон бүтээн байгуулалтын ажлын нэг нь Үндэсний цэцэрлэгт хүрээлэн. Нийслэлчүүдийн ундны эх үүсвэрийг хамгаалсан энэхүү зурваст байгаль орчныг нөхөн сэргээж, иргэдийн амарч зугаалах орчныг бий болгохоор энэ жил 1,4 тэрбум төгрөгийн тохижилтийн ажил хийнэ. Мэргэшсэн чадварлаг комданиудыг чиглэл чиглэлээрээ энд орж ажиллахыг хотын дарга уриад тус газарт орон сууцны зориулалттай нэг ч байшин баригдахгүй гэдгийг санууллаа.

Жилийн жилд хөрөнгө оруулалтыг нь нэмэгдүүлэх бодлого баримталж буй хотын гэрэлтүүлэгт компаниуд оролцох боломж байна. Гагцхүү технологийн өндөр шалгуур тавьж буй хотынхны болзлыг л биелүүлчихвэл болох нь тэр. Хилийн дээс алхангуут Эрээнээс хэдэн гэрэл оруулаад ирэх бол хэн ч хийж чадах ажил учир хот орчин үеийн өндөр технологи хангасан байх гэдэг шаардлага тавьж байгаа.  

Улаанбаатар хот хөрсний усаа ашиглах судалгаа хийлгэж байгаа. Туршлагатай улсуудын мэргэжилтнүүдтэй хамтран хийж буй энэхүү судалгааны ажил удахгүй дуусахаар технологийн дагуу хөрсний усыг шинээр баригдаж буй орон сууцны хороолуудын 00-д ашиглах, хотын ногоон байгууламжийн усалгаанд хэрэглэх гээд олон ажлууд ундарна. Мөн өнгөрсөн жилийнхээс дутуугүйгээр өрнөх зам барилгын ажил, үерийн далан сувгийг шинэчлэх, автобусны эцсийн буудлуудын тохижилт гээд өнөө жил хийгдэх томоохон ажлууд дээр ч хот хамтрагчаа хүлээж байна. 2011 онд улсын төсвийн хөрөнгө оруулалтаар 184 төсөл арга хэмжээнд 123,7 тэрбум, нийслэлийн төсвийн хөрөнгө оруулалтаар 83 төсөл, арга хэмжээнд 88,4 тэрбум төгрөг, нийт 267 төсөл арга хэмжээнд 212,1 тэрбум төгрөгийн ажил хийгдэнэ.