Австралийн Ерөнхий сайд Жулиа Гиллардын болон Гадаад хэргийн сайд Кевин Руд, Батлан хамгаалахын сайд Стифэн Смит нарын компьютерүүд кибер халдлагад өртсөн байна. Энэхүү халдлага болохоос өмнө АНУ-ын тагнуулын газраас Австралийн засгийн газрын аюулгүй байдалд аюул учирч болзошгүй талаар урьдчилан анхааруулж байсан тухай Сиднейн “Daily Telegraph” сонинд нийтэлсэн ба 10 гаруй сайдын компьютераас хэдэн мянган и-мэйлд нэвтэрсэн байж магадгүй хэмээн мэдээлжээ. Харин Австралийн засгийн газрын удирдлагууд энэхүү мэдээлэлд ямар нэг няцаалт хийгээгүй байна.
Кибер халдлага үйлдэгчдийн энэ удаагийн бай нь Австралийн парламентын танхимын гишүүдийн ашигладаг хамгаалалт султай цахим шуудангийн сүлжээ байжээ. Эх сурвалжуудын мэдээлж байгаагаар хакерууд Австралийн уул уурхайн салбарын мэдээлэлд нэвтрэхийг зорьсон бололтой гэсэн бол өөр нэг сурвалжийн мэдээлснээр Хятадын тагнуулын байгууллага эл хэрэгт холбоотой байж болзошгүй хэмээн бичжээ.