Бразилийн ерөнхийлөгч Дилма Руссеф санхүү, эдийн засгийн хүнд хямралд нэрвэгдээд байгаа Португаль улсад “тусламж үзүүлж чадна” гэж мягмар гаригт мэдэгджээ.

Ерөнхийлөгч Руссеф  “Тиймээ. Португаль улс урьд өмнө Бразилд тусламж үзүүлж байсан шиг Бразил улс одоо португальд эдийн засгийн талаар тус дэмжлэг үзүүлэх болно” гэж сэтгүүлчдийн тавьсан асуултад хариулсан байна.

Бразил улсын ерөнхийлөгч асан Лула да Силва “Португалийн засгийн газар ерөнхийлөгч Руссефийн танхимынхантай холбоо барьж, эдийн засгийн тусламжийн асуудлаар тодорхой ярилцах нь зүйтэй байх” гэж санал бодлоо илэрхийлсэн аж. Лула да Силва Грек улсад тусламж үзүүлэх шийдвэр гаргах талаар хэтэрхий их цаг хугацаа алдсан гэж Европийн Холбоог шүүмжлээд “Олон улсын валютын сан өр зээлэнд баригдсан орнуудад туслаж үзүүлэх оролдлого хийж байгаа боловч тусламж гэхээсээ илүү асуудал бэрхшээл нэмж бий болгоод байна” гэж хэлсэн аж.
Португаль улс өр зээлээ даруй төлөх бэрхшээлтэй тулгараад байгаа бөгөөд 4 дүгээр сарын 15 хүртэл 4,2 тэрбум евро, 6 дугаар сарын 15 хүртэл 4,9 тэрбум еврогийн зээл тус тус төлж дуусгах шахалтад ороод байгаа ажээ.