Тунисийн хэдэн мянган иргэд Засгийн газар, эрх баригчдын үйл ажиллагааг эсэргүүцэж, өчигдөр жагсаал зохион байгуулжээ. Тус улсын эрх баригчид саяхан Үндсэн хуульдаа өөрчлөлт оруулсан бөгөөд шинэ зүйл заалт нь эмэгтэйчүүдийн нийгэмд эзлэх байр суурийг улам дордуулна гэж үзсэн иргэд ийнхүү эсэргүүцлийн жагсаал зохион байгуулсан байна. Жагсаалд 6000 гаруй хүн оролцсоны дийлэнх нь эмэгтэйчүүд байжээ. Тэд Тунисийн 1956 онд батлагдсан Үндсэн хуульд эрэгтэй, эмэгтэй хүмүүс адил тэгш эрхтэй гэж заасныг хэвээр үлдээхийг хүсч буй юм.

Жагсагчид Тунисийн нийслэл хотод гол, төв замуудаар жагсан явж, өнгөрсөн аравдугаар сараас хойш төрийн эрхийг барьж буй, Лалын шашинтнуудаар удирдуулсан Эннахда намыг Үндсэн хуульд өөрчлөлт оруулахынхаа оронд улс орны хөгжил, ажилгүйдэл гэх мэт чухал асуудалд анхаарлаа хандуулахыг шаарджээ. Мөн тэд Эннахда намын тэргүүн, “Ерөнхий сайд Мохаммед Ганнуши зайл”,”Тунисийн эмэгтэйчүүд хүчтэй” гэх мэт үгс бүхий уриа лоозон барьсан байжээ. Эннахда нам нь Исламын шашны аядуу үзэл баримтлалтай нам бөгөөд улс төрийн хатуу үзэл баримтлалтай лалын шашны хуулийг мөрдлөгөө болгодог Салафигийн мусилманчууд ба лалын шашныг эсэргүүцдэг хоёр намын дунд, дарамт шахалт дор төрийн эрхийг барьж байгаа аж.

Дашрамд хэлэхэд Тунис нь Арабын хамгийн ардчилсан орнуудын нэг ажээ.