Залуучуудын гудамжны модыг “цэвэрлэж” байна

Уншигчдаас ирүүлсэн “Монгол дахь Энэтхэгийн элчин сайдын яамны байрны урд талын зам дагуу ургасан моддыг хөрөөдөж байна” гэх мэдээллийн дагуу газар дээр нь очиж, “Сүхбаатар тохижилт” компанийн ажилтан К.Лхагвасүрэнтэй уулзлаа.

-Хүмүүс бидэнд хандахдаа эрүүл моддыг хөрөөдөж байна гэсэн мэдээлэл өгсөн юм?

-Үгүй ээ. Сүхбаатар дүүргийн “Сүхбаатар тохижилт” ХХК-иас дүүргийн нийт нутаг дэвсгэр, нийтийн эзэмшлийн зүлгийг хяргах, мод ургамлыг засах ажлыг нэгдсэн журмаар гүйцэтгэж байгаа. Бид энэ дагуу л Залуучуудын гудамжны шарилж, хогийн ургамлуудыг түүж, ногоон зүлгийг тэгшилж байна.

-Гэхдээ зарим модыг бас тайрч байна шүү дээ?

-Ургахаа больсон, өнгө үзэмж нь алдагдсан моддоос жил бүр тодорхой хэмжээгээр тайралт хийдэг. Энэ дагуу ургалт нь зогссон цөөн модыг тайрч байгаа юм.

-Модны хожуулыг яах уу?

-Энэ хэсгийг газартай нь тэгшлэх ёстой.

-Хотын өнгө үзэмжийг сайжруулахын тулд мод тайрдаг юм байж. Тэгвэл оронд нь шинээр мод тарих уу?

-Мод тарих ажлыг бас төлөвлөгөөгөөр хийдэг. Улирлын чанартайгаар мод тарих ажлаа гүйцэтгээд явах байх.