Олимпийн наадмын хөлбөмбөгийн тэмцээн нээлтийн ёслолоос хэд хоногийн өмнө эхэлдэг уламжлалын дагуу “Лондон-2012” зуны XXX олимпийн наадмын эмэгтэйчүүдийн хөлбөмбөгийн тэмцээн өнөөдрөөс эхэлж байна. Долдугаар сарын 25-нд эхэлж, наймдугаар сарын 9-нд аваргаа тодруулах эмэгтэйчүүдийн хөлбөмбөгийн тэмцээнд 12 орны баг E, F, G гэсэн гурван хэсэгт хуваагдан, өрсөлдөх юм.

Тэмцээний эхний өдөр буюу өнөөдөр дээрх гурван хэсгийн эхний тоглолтууд болно. Талбайн эзэн Их Британийн шигшээ багийн тамирчид Монголын цагаар 23.00 цагт Шинэ Зеландын багтай тоглох бол залгуулаад 00.00 цагт “F” хэсгийн Япон ба Канад, “G” хэсгийн АНУ ба Францын шигшээ багийн тоглолт болох хуваарьтай байна. Мөн 01.45 цагт “Е” хэсгийн Камерун ба Бразили, харин 02.45 цагт “F” хэсгийн Швед ба Өмнөд Африк, “G” Колумб ба БНАСАУ-ын шигшээ багийн тоглолтоор үргэлжилнэ.

Харин маргааш буюу 26-нд эрэгтэйчүүдийн хөлбөмбөгийн тэмцээн эхэлж, дөрвөн хэсэгт сугалаа таарсан багууд эхний тоглолтоо хийх юм.