УИХ-ын анхдугаар чуулганы үргэлжлэлийг 10.00 цагт зарласан боловч УИХ дахь МАН-ын бүлгийн гишүүд оролцох боломжгүй байгаагаа илэрхийлж, мөн Д.Дэмбэрэл гишүүн захирамж гаргаад байгаа. Тиймээс Ардчилсан намын дарга Н.Алтанхуяг чуулганы танхимд байр сууриа илэрхийллээ. Тэрбээр “Д.Дэмбэрэл гишүүн сая надтай уулзах хүсэлтээ утсаар илэрхийллээ. Д.Дэмбэрэл гишүүн хамгийн ахмад гишүүн, хуралдааныг удирдах ёстой хүн. Гэвч намынхаа ажлыг тэргүүнд тавиад чуулганд орж ирэхгүй байна. Өнөөдөр МАН-ын Бага хурал болж байгаа, энэ мэтээр цаг хожиж төрийн ажлыг гацааж байна. Намайг үгээ хэлж дууссаны дараа манай бүлгийн гишүүд байр сууриа илэрхийлээрэй” хэмээн хэлсэн юм. Р.Гончигдорж гишүүн хэлэхдээ “Д.Дэмбэрэл гишүүн үүргээ хүлээхгүй байна, дуудаж уулздаг дарга биш, чуулганы танхимд орж ирж, хуралдаан даргалах үүргээ биелүүлэх ёстой” гэж мэдэгдлээ. УИХ дахь Ардчилсан намын бүлгийн гишүүдээс дийлэнх хэсэг нь байр сууриа илэрхийлэхээр кноп дараад байна.

Өчигдөр орой Монгол Улсын Ерөнхийлөгч АН, МАН-ын дарга, УИХ-ын чуулганы хуралдаан даргалагч Д.Дэмбэрэл  нартай уулзан зөвшилцөж, анхдугаар чуулганыг үргэлжлүүлэхээр болсон байгаа.  Гэвч МАН-ын бүлгийнхэн ирээгүй тул насаар хоёр дахь ахмад
гишүүн болох МАХН-МҮАН-ын “Шударга ёс” эвслийн бүлгийн гишүүн, хуульч
Л.Цогоор хуралдаан даргалуулах саналыг АН, "Шударга ёс" эвлэлийнхэн болон бусад гишүүд дэмжээд байна.

НЭМЭЛТ: 11.35 цаг

Л.Цогийг хуралдаан даргалагчаар сонгоё гэв

УИХ-ын чуулганы танхимд УИХ дахь Ардчилсан намын бүлгийн гишүүд ээлж дараалан байр сууриа илэрхийлж байна. УИХ-ын гишүүн Ч.Сайханбилэг хэлэхдээ “Бүлэг байгуулагдаагүй байгаа нөхцөлд цөөнхийн бүлэг УИХ-ын даргад нэр дэвшиж байгаа хүнийг заавал бүлгийн хуралдаандаа оролцох хууль эрх зүй байхгүй. Тэгээд ч эвслээр бүрдсэн олонхийн гишүүн цөөнх дээр очиж үйл ажиллагаа, бодлого тохирдог жишиг тогтоож болохгүй. Д.Дэмбэрэл гишүүн ахмад настныхаа хувьд чуулганы танхимд орж ирэх ёстой. Горимын санал гаргаж байна, морь цаг эхэлж байна. Долдугаар сарын 20-нд Ардчилсан намын зүгээс УИХ-ын даргыг томилох асуудлыг зөвшилцөхөөр албан бичиг хүргүүлсэн. Зөвшилцөл дөрөв хоног үргэлжилж байна. Хугацаа бол хангалттай, Л.Цогийг хуралдаан даргалагчаараа сонгоод УИХ-ын даргаа томилоод явъя” гэлээ. Мөн УИХ-ын гишүүн Д.Тэрбишдагва Н.Алтанхуяг дарга Д.Дэмбэрэл гишүүний насыг хүндэтгээд чуулганы танхимд урь гэлээ. УИХ-ын гишүүд байр сууриа ээлж дараалан илэрхийлсээр байна.

НЭМЭЛТ: 12.00 цаг

УИХ-ын гишүүн Л.Цог чуулганыг удирдаж байна