Хойд Америкийн үндэсний сагсан бөмбөгийн холбооны улирлын тог­лолтууд өндөрлөх шатандаа ороод байна. Дэлхийн хамгийн хүчирхэг лигт хүч сорьж буй 30 баг одоогоор 72-74 тоглолт хийгээд байгаа юм. Тэгэхээр плей-оффын ширүүн тулаан эхлэхийн өмнө багуудад ердөө 10 хүрэхгүй тоглолт үлдсэн хэрэг.

Олон шинэ амжилт, олон шинэ оддыг төрүүл­сэн гайхамшигтай улирал төгсгөл шатандаа улам бүр сонирхолтой болж байна. Сүүлийн хэдэн жилийн туршид плей-оффын эрхээ халаасалсан багууд плей-офф эхлэхийн өмнө түлхүүр тоглогчдоо нөөж амраадаг байсан бол энэ улиралд багууд плей-оффын байрлалын төлөө хүчтэй тэмцэл өрнүүлж, од тоглогчдод амрах бололцоо гарахгүй байна.

Одоогоор Дорнод бүсэд таван баг плей-оффт өрсөлдөх эрхээ авчихаад байгаа бол үлдсэн гурван байрын төлөө “Филадельфия 76”, “Нью-Йорк Никс”, “Индиана Пейсерс”, “Шарлотт Бобкэтс”, “Милваки Бакс” гэсэн таван баг өрсөлдөж байна.  Дээр дурдсан багуудаас эхний гурав нь плей-оффын байрлалд бичигдэж байгаа ч энэ дараалал өөрчлөгдөх магадлал тун өндөр. Гэхдээ тэдгээрээс Филадельфия болон Нью-Йорк хотын багууд дараагийн шатанд шалгарах магадлал харьцангуй их. Учир нь энэ хоёр баг араасаа нэхэж яваа багуудаас 3-5 хожлоор илүү байгаа юм. Наймдугаар байрт бичигдээд байгаа залуу “Индиана”-гийн үлдсэн учраанууд нэлээд хатуухан байгаа. Гэхдээ тэдний ард яваа “Шарлотт”, “Милваки”-г ч хүндхэн учраа хүлээж байна. Сүүлийн таван тоглолтдоо хожигдсон “Нью-Йорк” энэ байдлаараа тааруу тоглоод байвал наймдугаар байр руу, бүр плей-оффт ч орж чадахгүй байх аюултай. Гэхдээ тэдэнд “Шинэ” их гурвал бий.
Дорнод бүсийн плей-оффт орох сүүлийн байруудын өрсөлдөөн ид өрнөж байхад эхний гурван байрын төлөөх өрсөлдөөн ч их байна. “Чикаго Буллз” сайн тоглолтоо үргэлжлүүлсээр “Бостон”-гоос хоёр хожлоор илүү гарсан бол “Майами Хит” өчигдөр хожсоноор NBA-ын түүхэнд хамгийн олон түрүүлсэн багтай хожлын тоогоор тэнцээд байна.

Харин “Зэрлэг Өрнөд”-д дөрвөн баг л плей-оффын эрхээ өвөртөлжээ. “Сан-Антонио Сперс”, “Лос-Анжелес Лейкерс”, “Оклахома Сити Тандер”, “Даллас Маверикс” багууд хожил, хожигдлын харьцаагаар бусдаасаа тасраад байгаа. Эдгээр багууд мөн л байрлалын төлөөх өрсөлдөөн гаргаж байгаа. Гурван түлхүүр тоглогчоо гэмтэлд алдаад байгаа ли­гийг тэргүүлэгч “Сан-Антонио” үлдсэн тоглол­тууддаа тааруу тогловол тэднээс дөрвөн хожил дутуу араас нь нэхэж яваа “Лейкерс”-т гүйцэгдэх магадлал өндөртэй байна. “Лейкерс” Бүх оддын тоглолтоос хойш 16 тоглолт хийснээс ганцхан удаад нь л хожигдсон. Тэд дахин аваргын цомын төлөө л тоглох болно. Харин тэдний ард бичигдэж байгаа “Тандер”, “Маверикс” багууд гурав болон дөрөвдүгээр байр байрын төлөөх өрсөлдөөнийг хийх болов уу.

Энэ бүсийн сүүлийн дөрвөн байрын төлөөх өрсөлдөөн нөгөө бүсийнхээс дутахгүй өрнөж байна. Учир нь долоон баг дөрвөн эрхийн төлөө “тэмцэлдэнэ”. Гэхдээ зарим багуудын боломж тун бага. “Денвер Наггетс” 44 хожилтой одоогоор тавдугаар байрт бичигдэж байгаа бол тэдний ард “Портланд” Трейл Блейзерс”, “Нью-Орлеан Хорнетс” багууд 42 хожилтой тэнцүү явж байна. Харамсалтай нь, “Нью-Орлеан”-ы байдал хүндхэн болсон учир нь багийн онооны лидер Дэвид Уэст өвдөгний гэмтлийн улмаас энэ улиралд талбайдаа эргэн ирэх боломжгүй болоод байгаа юм. Тэдний адил “зовлон”-той улирлыг үргэлжлүүлж байгаа “Мемфис Гриззлис” 41 хожилтой плей-оффын эрх бүхий сүүлийн байрлалд бичигдэж байна. Рүди Гейгүйгээр давгүй сайн тоглосоор байгаа тэдэнд плей-офф ойрхон мэт харагдаж байж болох юм. Гэхдээ тэдний бүдрэлтийг “Хьюстон Рокетс”, “Финикс Санс” багууд анхааралтай ажиглаж байгаа. Харамсалтай нь, тэдний хувьд энэ боломж нь хонгилын үзүүрт сүүмийх гэрэл төдий. Стив Нэшээр ахлуулсан “Санс”-ын үлдсэн учраанууд нэлээд хүндхэн байгаа нь тэдний магадлалыг улам багасгаж байгаа юм. Харин “Мемфис”, “Хьюстон” багууд өөрсдөөсөө шалтгаалж дараагийн шатанд гарах эсэхээ шийднэ. 

NBA-ын улирлын тоглолтууд дөрөвдүгээр сарын 14-нд өндөрлөж, плей-оффын шатанд өрсөлдөх өрнөд, дорнод бүсийн тус бүр найман багийн нэр тодорно.

Дорнод бүс
 
    Багийн нэр                            Хожил                Х.дол    
 
1    Чикаго Буллз                            53                        19      
2    Бостон Селтикс                         51                        21      
3    Майами Хит                               51                        22      
4    Орландо Мэжик                        47                        26      
5    Атланта Хаукс                           42                        32      
6    Филадельфия 76                       37                        36      
7    Нью-Йорк Никс                         35                        38      
8    Индиана Пейсерс                     32                        42      
9    Шарлотт Бобкэтс                      30                         42      
10    Милваки Бакс                        29                         43      
11    Детройт Пистонс                    26                         47      
12    Нью-Жерси Нэтс                    23                        49      
13    Торонто Рэпторс                    20                        53      
14    Вашингтон Визардс               17                        55      
15    Кливлэнд Кавалиэрс            14                          58     

Өрнөд бүс
 
    Багийн нэр                        Хожил                    Х.дол      

1    Сан-Антонио Спөрс                57                    16      
2    ЛА Лейкерс                           53                    20      
3    Даллас Маверикс                  52                    21      
4    Оклахома Сити Тандер          48                    24      
5    Денвер Наггетс                     44                    29      
6    Портлэнд Трейл Блейзерс     42                    31      
7    Нью-Орлеан Хорнетс            42                    32      
8    Мемфис Гриззлис                41                    33      
9    Хьюстон Рокетс                   38                    35      
10    Финикс Санс                     36                    36      
11    Юта Жазз                          36                    38      
12    Голден Стейт Варриорс     32                    42      
13    ЛА Клипперс                     29                    45      
14    Сакраменто Кингс             20                    52      
15    Миннесота Тимбервулвес  17                    57