Ерөнхий сайд Сильвио Бер­лускони Итали орноо дэл­хийд сурталчлах гол нүүр ца­рай нь болжээ. Гэхдээ мань Берлускони охид, хүүхнүүдтэй орооцолддог асуудлаар биш, улсынхаа өв соёл, зан заншил, үзэсгэлэнт байгаль, эртний түүхт музей, уран барилгуудаа 15 минутын туршид сурталч­лах болов. Ерөнхий сайддаа ийм том “даалгавар” өгдөг Аялал жуулчлалын сайд Вик­ториа Брамбилла яасан ч зо­риг, зүрхтэй юм. Тэрбээр эт­гээд зантай Берлускониг сур­тал­чилгаанд тоглуулсан тухай­гаа “Дэлхийн бүх ул­сын түүхэнд төрийн өн­дөр албан тушаалтныг зар сур­талчилгааны гол нүүр ца­рай­гаар анх удаа тодрууллаа” гэв. Ёстой залдаг нөхөр үү, үгүй юү. Берлускони зар сур­талчилгаанд тоглосноороо дэл­хийд анхдагч гэвэл үүн шиг худал зүйл үгүй. УИХ, Засгийн газрын ги­шүүд дуулж, бүжиглэх, жүжиг­лэхийн хувьд Италийн Ерөн­хий сайдыг аль хэдийнэ ардаа орхичихсон. Ингэхэд ер нь Мон­голын телевизүүдийн гол нүүр царай нь хэн болдог би­лээ. Улстөрчид шүү дээ. Тэд хууль батлах гэж өдөржин хэ­рэлдэж, хэлэлцсэн стрессээ аль нэг нэвтрүүлэгт оролцож тайлдаг гэхэд болно. Хоол хий­нэ, дуу дуулна, бүжиглэнэ. Ёстой л уран нугарч, балет бүжиглэхээс бусдыг хийнэ. Тиймээс сүүлийн үед “УИХ-ын гишүүн гэж хэн бэ” гэдэг асуул­тад “Зад карао­кедож, хоол гаргууд сайн хийдэг хүнийг хэлнэ” гэх наргиантай яриа олны дунд дэлгэрчээ. Италичууд га­даадад жуулчлахыг илүүд үз­сэнээр жилд 15 тэрбум еврог бусад орны төсөвт нэмэрлэсэн байгаа юм. Тиймээс Берлус­конигоор дамжуулж, гадаадын жуулчдыг эх орондоо татах ШБОС хэрэгжүүлж эхэлсэн юм байх. Монгол ч гэсэн тэднээс дутах юу байх вэ. “УИХ-ын үйл ажиллагааг га­даадынханд нээлттэй суртал­чилна” гэчих­вэл яасан юм бэ. Улстөрчдийн маргаан, мэт­гэл­цээн, хөгжилтэй яриа, нэг нэгнээ доромжлох, ер чуул­ганы танхимд нүд бүлтийлгэж, чих дэлдийлгэм үйл явдал олон болдог биз дээ. Улс орноо жуулчдад ингэж сурталчиллаа гээд УИХ-ын 76 гишүүнд мөн­гө төлөх ч шаардлагагүй. Тэд ажлаа л хийж байгаа нь тэр. Тэгээд ч Берлусконигоос илүү авьяастай гэдгээ маш сайн нотлох биз.

Зохиогчийн эрх:
"Улс төрийн тойм" сонин