Ардын хувьсгалын 91 жилийн баяр наадмын өмнөх сүүлийн барилдаан буюу бөхчүүдийн наадмыг бэлтгэлийг шалгасан сорилго барилдаан өнөөдөр боллоо.

МҮБХ-ноос жил бүр үндэсний их баяр наадмын өмнө зохион байгуулдаг “Наадмын сорилго” барилдааныг “Практикал даатгал” компани МҮБХ-той хамтран зохион байгуулсан юм. Улсын гарьд Н.Ганбаатар, Ж.Бат-Эрдэнэ, улсын заан Д.Амгаланбаатар, Б.Соронзонболд, Ч.Санжаадамба, улсын харцага Л.Пүрэвжав, Т.Мөнгөнцоож, Т.Өсөх-Ирээдүй, А.Цацабшир, Э.Батбаатар, улсын начин Ж.Отгонбаяр, Б.Чинзориг, Б.Насандэлгэр нарын тэргүүтэй улс, аймгийн алдар цолтой 208 бөх зодоглосон сорилгод Говь-Алтай аймгийн Цээл сумын харьяат, “Хилчин” спорт хороо, “Хантайшир” дэвжээ, “Алтай констракшн” компанийн бө,х улсын гарьд Ж.Бат-Эрдэнэ түрүүлж, Сэлэнгэ аймгийн Орхонтуул сумын харьяат, “Алдар” спорт хороо, “Таванхан” дэвжээ, “Ноёд” группийн бөх, улсын харцага Т.Өсөх-Ирээдүй үзүүрлэлээ. Шөвгийн дөрөвт Говь-Алтай аймгийн Чандмань сумын харьяат, “Хүч” спорт хороо, “Хантайшир” дэвжээ, “Туушин” компанийн бөх, улсын гарьд Н.Ганбаатар, Увс аймгийн Давст сумын харьяат, “Увс нуур” дэвжээний бөх, аймгийн арслан П.Бүрэнтөгс нар шалгарчээ.