Японы “Фүкүшима” стан­цын нэг, хоёрдугаар блокт радиацийн төвшин нэмэгд­сэнээс гуравдугаар сарын 25-нд ажиллагсдыг тэндээс дахин нүүлгэжээ. Станцаас 30 км-ийн радиуст байгаа ар иргэдийг нүүхийг эрх баригчид санал болгоод байна. Харин түр хорогдох байранд  гэрийн тэжээмэл амьтдаа авч ирэхийг нь Засгийн  газар зөвшөөрсөнгүй.  Баасан гаригт “Фүкүшима” станцын нэг, хоёрдугаар блокт цацраг туяаны төвшин да­хин нэмэгдсэн учир Токио­гийн эрчим хүчний компани ажлаа зогсоон ажилчдыг нүүлгэжээ. Урьд­чилсан дүгнэлтээр эрчим хүч­ний блокуудын ёроолд тунасан ус цацраг идэвхт боди­сын төвшинг нэмэгдүүлсэн байна.

Эрчим хүчний мэргэжилт­нүү­дийг гурав дахь тогоо ихээ­хэн түгшээж байгаа юм. Японы  Атомын болон аж үйлд­вэрийн аюулгүй байдлын агентлагийн хэвлэлийн төлөө­лөгч Хидехико Нишияма  гурав­дугаар тогоог гэмтсэн байж магад­гүй гэлээ. Блокийн дотор талд радиацийн төвшин өн­дөр байгаагаас тэр ингэж хэлжээ.

Радиацийн эх үүсвэр нь түлшний савханцарууд эсвэл цөмийн түлш шавхагдсан усан сан байж болох юм. Урьд өдөр нь тэнд ажиллаж байсан гур­ван ажилчин цацраг туяанд ихээр хорд­жээ. Ком­пани одоо блокт хуралд­сан усны хаягдлыг зайлуулах болом­жийг судалж байна. Батлан хамгаалах яамны сайд Тошима Китазава АЦС-ын цэвэр­лэхэд Америкийн цэр­гийнхэн тусална гэж мэдэг­дэв. Америкийн мэргэ­жилт­нүүд чу­­хам юу хийх талаар тэр тодруулаагүй ч цөмийн то­гоо­ны хөргөлтөд туслана гэжээ.

Станцаас 30 км-ийн бүсэд  байгаа ард иргэдийг өөрсдөө нүүхийг эрх баригчид санал бол­гов. Японы Шинжлэх ухаан, тээврийн яам тайл­барлахдаа 30 км-ийн бүсэд байгаа хүмүүс нэг хоногийн дотор жилийн радиацийн хэм­жээтэй тэнцэх цацраг идэвхт бодист хордоно гэсэн байна. Үүний зэрэг­цээ бохирдлын бүсэд ажил­лахгүй болж байгааг тээврийн компаниуд мэдэгджээ. Тус бү­сийн ир­гэд ой­рын хугацаанд хүнс, хоолны дутагдалд орно гэж эрх баригчид үзлээ. Сайн ду­раараа нүүгсдэд Засгийн га­зар туслана гэж танхимын ерөн­хий нарийн бичгийн дарга Юкио Эдано  мэдэгдлээ. Орон гэргүй болсон хү­мүүст илүү тав тухтай байр сууцыг хайж байна. Тэдний зарим нь Токиогийн төвд ерөнхийлөгчийн буудалд амьд­рах бо­лов. Дөчин давхар Grand Akasaka Hotel Prince буудалд одууд, улс­төрчид буудаллаж байлаа. Бай­шин хуучирсан учир энэ жил буулгахаар төлөв­лөсөн байв. Эзэн нь байрнуудад орон гэргүй хү­мүү­сийг байрлуулах санал гаргажээ. Нийт 700 орчим өрөөнд 1600 хүнийг байр­луулах гэнэ.

Орон гэргүй болсон хү­мүүс гэртээ үлдээсэн нохой муурандаа санаа зовж байгаа аж. Гимназийн ойролцоох модноос зургаан нас­тай Сар гэх нэртэй бигль нохойг уяжээ. Дэргэд нь цаасан хайрцагаар хийсэн урц, хоёр дэр байх аж. Савтай ус нь хөлдсөн байв. Нохойн эзэн 55 настай Масами Эдно түр байрандаа нохойгоо авчирч чадахгүй учир өдөр бүр хоолыг нь зөөх болжээ.  Түр байрны ойролцоо тавь­сан машинд нэ­гэн перс муур амьдарна. “Муур маань ихээхэн муухай зантай болж бас өвджээ. Тэр бол манай гэр бүлийн хэсэг гэтэл түүнийг түр байранд авч болохгүй. Ганцаардаж байх шиг байна” гэж муурны эзэн Тамае Морино ярив. Бидэнтэй байгаа нь түүнд аз юм. Гамшгийн дараа олон муур алга болсон гэж эзэгтэй нэмэн хэллээ.

Эдгээр амьтдын эзэд нь байгаа учир азтай гэхээр. Цунамид нэрвэгдсэн нутаг дэвсгэрт олон амьтад хаягдаж хоцорчээ. Шавар , шороо бол­сон амьтад хоол хүнс, эздээ хайн нуранги дундуур хэснэ. “Цунами гэрийн тэжээмэл амь­тдын хувьд том гай авчирчээ.  Тэдний олонх нь АЦС-ын хавийн бүсэд үлдсэн”  гэж Олон улсын нохойн United Kennel Club клубын Японы салбарын төлөөлөгч Сугано Хосо ярьж байна. Эрх баригчид тэжээвэр амьтдыг авчрахыг зөвшөөрөхгүй байна гэж иргэд гомдол гаргалаа. Хосо ба түүний нөхөд, тэнэмэл болсон эзэнгүй амьтадад туслахаар хоол зөөж байна. “Бид Засгийн газарт эзгүй бүсээс амьтадыг аврах санал тавьсан ч тэд зөвшөөрөхгүй байна” гэж Хосо хэллээ. 

Арахама хотын амьтны дэл­гүүрийн эзэн Рио Тайра эзэд нь орхиж явсан амьтдыг түр хугацаагаар  хүлээн авч байна. Одоо 80 орчим нохой муур цугларчээ. Тэд­ний давхарлан тавьсан хайрцаг­т тэжээж байгаа ажээ.  Өдөр бүр сайн дурынхан амьтдыг салхилуулдаг гэнэ. “Цунамий­н уршгаар хамаатан саднаа алдсан хүмүүс сэтгэл маш хүнд дарамтад байгаа. Тэдэнд амьтдаа анхаарах сэгээ алга. Энэ хүнд нөхцөлд бид хүмүүст тусалж байна” гэж Тайра ярилаа.