Засгийн газраас үндэсний үйлдвэрлэгчиддээ дэмжих зорилгоор ноос, ноолуурын экспортын татварыг сэргээх хуулийн төслийг УИХ-д өргөн барихаар зэхэж байна.Энэ оны хоёрдугаар сарын 8-ны өдөр Монгол Улсын Ерөнхий сайд С.Батболд Монголын ноос, ноолууран эдлэл үйлдвэрлэгчдийн төлөөлөлтэй уулзаж салбарын өнөөгийн байдал, тулгамдсан асуудлын талаар ярилцсан. Энэхүү уулзалтын үр дүнгээр Монгол Улсын Засгийн газар УИХ-д Ноос, ноолууранд ногдуулах экспортын гаалийн татварын хэмжээг тогтоох тухай хуульд өөрчлөлт оруулах, экспортын татварыг сэргээх хуулийн төслийг өргөн барихаар болсон байна.
Энэхүү төсөл хэрэгжсэнээр дотоодын үйлдвэрлэгчдийг дэмжих, Хятадын үйлдвэрүүдийн монополь байдлын эсрэг алхам болно хэмээн Засгийн газраас үзэж байна. Мөн нөгөө талаас үйлдвэрлэгчид малчдаас ноолуурыг нь зах зээлд өрсөлдөхүйц үнээр авахыг санал болгож, малчдаа дэмжсэн бодлого хэрэгжүүлэх гэнэ.
2010 оны байдлаар Монгол улс 13,5 сая ямаатай байна. Үүнээс жилд 6000 орчим тонн ноолуур бэлтгэж байна. Нийт ноолуурынхаа 60 гаруй хувийг нь экспортолдог гэж үзвэл 3500 тн ноолуур экспортолдог гэсэн үг. Иймд нэг килограмм ноолуурын экспортын татварыг 10 мянган төгрөгөөр тогтоовол улсын төсөвт жилд 35 тэрбум төгрөгний хуримтлал бий болох юм.
