Удирдлагууд нь Шүүхийн шийдвэрээр ял сонсоод байгаа Авлигатай тэмцэх газар энэ өдрүүдэд олны анхаарлын төвд байна. Гэтэл даарин дээр давс нэмэв гэгчээр яг одоо АТГ-ын үүдэнд Хан-Уул дүүргийн иргэд эсэргүүцэл илэрхийлэн, цуглаад байна. Тэд Хан-Уул дүүргийн 1-р хороо, 120 мянгатын 9, 10 дугаар байрны оршин суугчдын хүүхдийн тоглоомын талбайд АТГ-ын ажилчдын орон сууц барих болсныг эсэргүүцэн ийн цуглаад байгаа аж. Нийт 20 орчим оршин суугч байгаа талаар манай сурвалжлагч мэдээллээ.

Оршин суугчид “АТГ-ын мэргэжилтэн Төмөрхуяг гэж хүн тэдэнтэй уулзаж, Нийслэлийн Газрын албаны дарга Ц.Сундуйгийн гарын үсэгтэй газрын зөвшөөрлийн бичиг үзүүлэн, барилга барих болсноо танилцуулсан. Бид үүнийг хүлээн зөвшөөрөхгүй” хэмээж байна. АТГ-ын гадаа цуглаад байгаа эдгээр хүмүүс “АТГ дээрэм хийхээ боль” гэхчлэн бичсэн лоозон барин иржээ. Одоогоор албан байгууллагын цайны цаг таарсан тул АТГ-ын холбогдох хүмүүс оршин суугчидтай уулзах боломжгүй байгаа аж. Мэдээллийг үргэлжлүүлэн хүргэх болно.