“Хасын хүлгүүд” сая төгрөгийн эзэн болов

Хуучирсан мэдээ: 2011.03.24-нд нийтлэгдсэн

“Хасын хүлгүүд” сая төгрөгийн эзэн болов

Энэ жилээс эхлэн Nissan премьер лиг нэрээр зохиогдож буй Монголын сагсан бөмбөгийн холбооны дээд лигийн аварга шалгаруулах 16 дахь удаагийн тэмцээний III буюу сүүлийн тойргийн тоглолтууд өчигдөр эхэллээ. Бүтэц, зохион байгуулалт, удирдлагын төвшинд шинэчлэгдэж, үйл ажиллагаагаа явуулж буй МСБХ-ны энэ жилийн дээд лигийн нэг шинэлэг зүйл нь тойрог бүрийн төгсгөлд тухайн тойргийн ялагч багийг тодруулж, нэг сая төгрөгөөр шагнаж урамшуулах болсон юм. Эхний тойргийн тоглолтууд өндөрлөсний дараа МУИС-ийн “Баянзүрх Буллз” баг анхны нэг сая төгрөгийн эзэн болсон бол өнгөрсөн жилийн аварга “Хасын хүлгүүд” хоёрдугаар тойрогт амжилтаараа илүүрхжээ. Тэд маргааш ШШГЕГ-ын “Сүлд” спорт хорооны “Офицерууд” багтай тоглохоор таарсан бөгөөд тус тоглолтын үеэр “Хасын хүлгүүд”-д нэг сая төгрөгийн урамшуулал гардуулах аж.

Дашрамд дурдахад, Nissan премьер лигийн гуравдугаар тойргийн эхний тоглолтууд өчигдөр Спортын төв ордны А зааланд болж, “Харцага”, “Буллз” болон “Ав-Атар” багууд ээлжит хожлоо авсан байгаа. “Энержи Ресурс” компанийн “Харцага”-ууд “TLG-13” багийг 65:63 харьцаатай хожсон бол “Баянзүрх Буллз” 80:76-аар ШУТИС-ийн “Акулууд”-ыг буулган авчээ. Харин “Ав-Атар” баг ХҮДС-ийн “Ирвэс” багийг 82:66 харьцаагаар илт давуу буулган авсан байна.

С.Цэлмэг

NewsMN Гар утасны хувилбар Татах
NEWS.mn

Мэдээллийн эх сурвалж