Нийслэлийн АН-ын анхан шатны байгууллагуудын удирдах ажилтны зөвлөгөөн өнөөдөр Төрийн ордонд боллоо. Монгол Улс ардчилалд хөл тавьсан 1990 оноос хойш болсон орон нутгийн сонгуулиудаар Ардчилсан нам нийслэлд ялалт байгуулж ИТХ-д олонх болж  үзээгүй . Энэ байдалдаа  дүгнэлт хийн АН-ын  анхан, дунд шатны байгууллагын үйл ажиллагааг эрчимжүүлж идэвхийг нэмэгдүүлэх талаар нийслэлийн АН-ын удирдах ажилтнууд зөвлөлдлөө.

Зөвлөгөөнийг нийслэлийн АН-ын дарга Ш.Түвдэндорж нээж улс төрийн илтгэл тавьжээ.  Уг арга хэмжээнд нийслэлийн АН-ын дөрвөн дэд дарга, есөн дүүргийн нийт 800 орчим гишүүд, дэмжигчид оролцсон байна. Удахгүй нийслэлийн ИТХ-ын сонгууль болох гэж байгаатай холбогдуулан нийслэлийн АН-ын идэвхтэн, сонгуультан гишүүдийг сонгуулийн бэлтгэл ажилд хамтруулах, сонгуулийн мөрийн хөтөлбөр болон саяхан батлагдсан Сонгуулийн тухай хуулийн талаарх ойлголтыг нэмэгдүүлэх зорилгоор уг зөвлөгөөнийг зохион байгуулсан байна.