Монгол төрийн шүүх Авлигатай тэмцэх газрын даргад бурууг нь хүлээлгэж, түүнийг яллаж чадлаа. Энэ бол урьд нь байгаагүй том амжилт. Ардчилсан Ерөнхийлөгч шүү­хийн салбарт шинэтгэл хийж, хамтарсан Засгийн газар бай­гуулснаар улстөрчид асуу­далд шударгаар хандаж эхэлсний үр дүн энэ. Хэрэв аль нэг нам дангаараа Засгийн эрх барьж байсан бол ийм шударга, зоригтой шийдвэр гаргаж чадахгүй байсан гэдэгтэй олон хүн санал нийлэх биз ээ.

АТГ-ын дарга Ч.Сан­гарагчаа  өөрийн удирдлагад ажиллаж байсан  Мөрдөн шалгах хэлтсийн дарга Э.Амарбат, Хяналт шалгалт, дүн шинжилгээний хэлтсийн дарга Ж.Батсайхан нарын өрөөнд чагнах төхөөрөмж суурилуулсан нь Эрүүгийн хуулийн  133.2 буюу Гүй­цэтгэх ажиллагааны тухай хуулийг зөрчсөн тул нэг жилийн ял оноосон. Төрийн нууц задруулсан хэрэгт нь нэг жил, Эрүүгийн хуулийн тусгай ангийн 111.2-т заасныг үндэслэн дөрвөн сар гээд нийт 2.4 жил  хорих ял эдлүүлэхээр болсон. Мөн төсвийн мөнгийг үр ашиггүй зарцуулсан хэрэгт буруутган нэг жилийн хорих ял оноосныг  Өршөөл үзүүлэх тухай хуульд хамруулсан байна. Түүнчлэн АТГ-ын дэд дарга Д.Сундуйсүрэн, Гүй­цэтгэх албаны дарга Ө.Алтангадас нарт тус бүр хоёр жил хорих ял оноож, тус газрын Тамгын газрын дарга Г.Бадарчид холбогдох хэргийг гэмт хэрэгт холбогдолгүй хэ­мээн үзэж цагаатгасан аж. Ийм гэм бурууг яллаж чадахгүй бол ардчилал, шударга ёс гэж яриад ч яах билээ. Харин өчигдөр АТГ-ын Тамгын газрын дарга Г.Бадарч “Дарга, дэд дарга нарыг хорьсноос болж АТГ эзгүйрлээ.

Авлигын тухай хуульд ийм тохиолдолд АТГ-ыг хэн удирдах тухай тусгаагүй учраас нөхцөл байдлаа Засгийн газарт танилцуулна” хэмээн сэтгүүлчдэд мэдээлэв.

 Тэгэхээр Засгийн газар ойрын үед энэ тухай хэлэлцэж, хуульд өөрчлөлт оруулах арга зам хайх нь. Одоо л дөнгөж энэ талаар ярьж байгаа нь инээдтэй  л юм. Гэхдээ энэ бол дараагийн асуудал. Хамгийн гол нь АТГ-ын даргын гэм буруутай үйлдлийг шүүх тогтоож, ялыг нь хүлээлгэж чадлаа. Тэр тусмаа анхан шатны шүүхээс ийм шийдвэр гаргаад гэмтнүүдийг Ганцхудагийн урьдчилан хорих төв рүү шууд аваачсан. Ардчилсан зарчимтай улс орны хувьд энэ бол хамгийн үнэ  цэнэтэй ялалт юм. Ийм шударга, эр зоригтой шийдвэр гарган үүргээ биелүүлж  ажилласан Чингэлтэй дүүргийн шүүхийн дарга Н.Цогтсайханд бас талархах ёстой.

Энэ хэрэг удаан хугацаанд олны анхаарлын төвд байсан. Ч.Сангарагчаа дарга ч Авлигын эсрэг хуульд хууль эрх зүйн баталгаа хэмээн зааснаар хамгаалалтад орно гэдэгтээ ихээхэн итгэлтэй байгаа нь мэдрэгдэж байлаа. Тэр ч байтугай  улс төрийн хүрээний найз нөхдийн дэмжлэгээр улс төрийн хамгаалалтад ч орж мэднэ хэмээн найдаж явсан биз. Гэвч хөдөлшгүй баримтаар нотлон хэргийг хүлээлгэсэн тул тэрбээр яаж ч чадалгүй удирдлага дор нь ажиллаж байсан хоёр хүний хамт ялаа эдлэхээр явав. Монголын төр түүнийг  авлигачидтай тэмцэх байгууллагыг удирдсаных нь төлөө өндөр цалин хангамжаар дөрвөн жил “эрхлүүлсэн”. Гэвч  тэр өөрөө Монголын төр хатуудаа хатуу гэдгийг харуулахад хүргэв.

АТГ-ын дэд дарга Д.Сун­дуйсүрэнгийн хувьд анхнаасаа л Ерөнхийлөгч Н.Энхбаярын гэргий О.Цолмонгийн дүү гэдгээрээ ан­хаарал татаж байлаа. Архангайд хэсгийн төлөөлөгч байхаас нь л хүргэн ах, эгчийнхээ буянд албан тушаалын “цахилгаан шат”-аар өсч, Цагдаагийн хэлтсийн дэд дарга, хэлтсийн даргаас шууд Нийслэлийн цагдаагийн газар, Улсын мөрдөн байцаах газрын дэд дарга болон дэвшиж, тэндээс Авлигатай тэмцэх газрын дэд даргаар томилогдсон. Уг нь даргаа эзгүйд орлох учиртай ч хамтарч гэм буруутай хэрэг үйлдээд, хөтлөлцөөд Ганцхудагт хоригдоно гэж хэн ч төсөөлөөгүй байх. Тэрбээр өөрөө ч “Дарга мэдэж байгаа, үгүйдээ гэхэд хүргэн ахын нэр сүр нөмөр нөөлөг хамгаалж үлдэнэ” хэмээн найдсанаас биш, анхан шатны шүүхийн танхимаас шууд ачигдана гэж бодоогүй л болов уу.

Ямартай ч Монголд шүүхийн салбарт хийх шинэчлэлийн салхи сэвэлзээд эхэлчихэж. Авлигатай тэмцэх газрын дарга хэрэг үйлдсэн бол ялыг нь хүлээлгэж болдог юм байна шүү дээ. Олон нийт үүнийг нүдээрээ харлаа. “АТГ-ын даргыг хэн ч яаж ч чадахгүй. Дуулиант энэ хэрэг тэгсхийгээд өнгөрнө биз” гэсэн үл итгэх байдал өнөөдрөөс өөрчлөгдөх биз ээ. Нэг л зүйлийг анзаарахад хэрэв нэг нам Засгийн эрхийг барьж байсан бол, ардчилсан Ерөнхийлөгчтэй байгаагүй бол ингэж чадах байсан эсэхэд эргэлзэж байна. Ардчилал гэж яриад, түүний төлөө зүтгээд 20 жилийг үдсэн ард түмний хувьд энэ бол том ялалт. Ардчилсан төрт улсад шүүхийн өмнө ард түмэн тэгш эрхтэй юм байна. Энэ чинь зүгээр л мөрөөдлийн чанартай уриа, лоозон биш, Үнэн бодитой, үнэ цэнэтэй эрх зүйн үндэслэл байж шүү дээ. Ард түмэн өдөр тутмын амьдралдаа үүнийг л бодитойгоор харж, мэдэрч, шүүх байгууллагад, төрдөө итгэж амьдрахыг хүсч байсан юм. Шүүхийн энэхүү шударга шийдвэр цаашид жишиг болох болтугай.

Зохиогчийн эрх:
"Улс төрийн тойм" сонин