Капитал банк болон Мобифинанс ББСБ хамтран холбоо харилцааны шинэ дэвшилтэт технологид суурилсан Мост Мони (ММ) үйлчилгээгээр дамжуулан “Хүний хөгжил сан”-гийн мөнгийг гар утсаар олгож эхэлж байна. Өнөөдөр энэхүү хамтын ажиллагааны “Харилцан ойлголцолын санамж бичиг”-т талууд гарын үсэг зурж, сэтгүүлчдэд мэдээлэл өгсөн юм.
Манай улсын айл өрх бүр гар утастай тул энэхүү үйлчилгээг нэвтрүүлснээр төрөөс олгож байгаа мөнгийг гар утсаар дамжуулан иргэдэд цаг хугацаанд нь олгох боломж бүрдэх юм байна.  
Хөдөлмөр халамж үйлчилгээний газраас иргэдийн мөнгө Капитал банкинд орсон тухай бүрт иргэдийн Мост Мони гар утасны дансанд мөнгө шилжин орж, энэ тухай мэдээлэл нь мессежээр ирж байх юм.
Харилцагчид Мост Монигийн 200 гаруй төлөөлөгчийн газар болон Капитал банкны аль ч салбараас мөнгөө бэлнээр гарган авч болох төдийгүй өөрийнхөө гар утсыг нэгжээр цэнэглэх, бусдын гар утсыг нэгжээр цэнэглэх, дараа төлбөрт ярианы төлбөрөө төлөх, Мост Монигийн гэрээт хамтрагч үйлчилгээний газруудад худалдаа үйлчилгээний төлбөрөө төлөх, мөн түүнчлэн Мобикомын хэрэглэгчид хоорондоо мөнгөн шилжүүлэг хүссэн газраасаа хүссэн үедээ хийх зэрэг өргөн боломжтой болж байна.
Дээрх үйлчилгээнд хамрагдахыг хүссэн Капитал банкны харилцагчид “Хүний хөгжил сан”-гийн мөнгөө авдаг Капитал банкны салбар дээр очиж, мөнгөө гар утсаар авах хүсэлт гарган бүртгүүлэх юм байна.