Авлигатай тэмцэх газрын  Тамгын хэлтсийн дарга Г.Бадарч өнөөдөр сэтгүүлчдэд мэдээлэл хийлээ. Түүнийг  өчигдөр Чингэлтэй дүүргийн шүүхэд болсон  АТГ-ын удирдлагуудтай холбогдох хэргийн шүүх хуралдаанаар гэмт хэрэгт холбогдолгүй хэмээн цагаатгасан  юм.  Өөрөөр хэлбэл, Г.Бадарч нь Эрүүгийн хуулийн 273 дугаар зүйлд зааснаар төсвийн мөнгө үр ашиггүй зарцуулсан хэрэгт буруутгаж байсан ч дээрх зүйл ангийг шүүх бүрэлдэхүүн хэрэгсэхгүй болгосон. 

Харин өнөөдөр тэрбээр дарга, дэд дарга нар нь ял сонсч, Ганцхудаг руу ачигдсанаас болж эзгүйрээд байгаа АТГ-ын нөхцөл байдлын талаар сэтгүүлчдэд мэдээлэл хийж, нөхцөл байдлыг УИХ-д танилцуулах болсон тухайгаа хэллээ.

Авлигын тухай хуулинд дарга дэд дарга нар нь эзгүй тохиолдолд тус байгууллагын ажлыг хэн удирдах талаар тодорхой тусгаагүй байдаг учир ийнхүү УИХ-д хандахаар болсон байна.  Сануулахад, Чингэлтэй дүүргийн анхан шатны шүүхээс өчигдөр АТГ-ын дарга Ч.Сангарагчаад 2.4 жил,  дэд дарга Д.Сундуйсүрэн, Гүйцэтгэх албаны дарга Ө.Алтангадас нарт тус бүр хоёр жилийн хорих ял оноосон юм.