“Тусгай зориулалтаар 2011 онд агнах, барих ан амьтны тоо толгойг тогтоох тухай” Засгийн газрын 2011 оны 65 дугаар тогтоолыг саяхан баталж, судалгаа, шинжилгээний зориулалтаар цоохор ирвэс хоёр хос толгойг агнахаар шийдвэрлэсэн. Энэ шийдвэртэй холбогдуулан зарим эрдэмтэн судлаач болон байгаль хамгааллын чиглэлийн төрийн бус байгууллагаас уг шийдвэрийг хянан үзэх хүсэлтийг Байгаль орчин, аялал жуулчлалын сайдад хандан ирүүлсэн байна.   

Хүсэлтийг харгалзан Байгаль орчин, аялал жуулчлалын сайд өчигдөр тэдгээр эрдэмтэн судлаач, олон нийтийн байгууллага, байгаль хамгаалах чиглэлийн төрийн бус байгууллагуудын төлөөллийг оролцуулсан чөлөөт хэлэлцүүлэг зохион байгуулжээ. Хэлэлцүүлгийн үеэр тэдний саналыг хүлээн авч, цоохор ирвэсийг агнахгүйгээр генетикийн судалгаа, шинжилгээ хийх боломжтой гэж шийдвэрлэсэн байна. Тиймээс БОАЖ-ын сайд Л.Гансүх өнөөдөр Засгийн газрын тогтоолд заасан цоохор ирвэс агнах квотыг ашиглахгүй байх тушаал гаргажээ.