МАХН-ын бага хурал үргэлжилж байна. Хуралдааны үеэр тус намын ерөнхий нарийн бичгийн дарга Н.Удвал удахгүй болох УИХ-ын сонгууль будилаантай явагдах нөхцөл үүсээд байгааг онцлоод “Сонгуулийг цахим үнэмлэх ашиглан явуулахаар төлөвлөөд байсан ч энэ ажил боломжгүй болсон. Мөн эрх баригчид төрийн албан хаагчдыг гадаад руу аялуулж, сонгуульд ашиглах нүхээ малтсан, УИХ-ын сонгуулийн тухай хуульд нэр дэвшигч бэлэг тараахыг хориглосон ч эл заалт хэрэгжихгүй байгаа гээд олон хууль зөрчсөн үйлдлүүд шил дараалан гарч байна. Гэвч энэ бүхний эсрэг МАХН-ын гишүүд, дэмжигчид тууштай зогсож, ард түмэн ялна гэдэгт итгэл төгс байна” гэлээ.

Яг одоо тус бага хурлаар МАХН-МҮАН-тай нэгдэн сонгуульд оролцох тухай асуудлыг хөндөн ярилцаж байна. МАХН-ын дарга Н.Энхбаяр баривчлагдахынхаа өмнөх өдөр “УИХ-ын сонгуульд манай нам аль ч нам, эвсэл холбоодтой нэгдэж ороход бэлэн байгаа. Гагцхүү ажил хийж чадах намтай эвсэнэ. Хэрэв МАН Оюутолгойн гэрээг өөрчилж, 34 хувийг 51 хувьд хүргэж, Тавантолгойг ард түмний мэдэлд 100 хувь өгч, амласан 1 сая төгрөгөө ард түмэндээ өгвөл тэдэнтэй ч нэгдэх боломж бүрэн байгаа” хэмээн  хэвлэлийнхэнд яриа өгч байлаа. Үүнийг нь улстөрийн хүрээнийхэн УИХ-ын сонгуульд МАХН дангаар оролцохгүй МҮАН-тай хүч хавсарч орохын илэрхийлэл хэмээн “орчуулж” ойлгож байлаа. Тэгвэл өнөөдөр энэ асуудлыг МАХН-ын гишүүд бага хурлаараа шийдэх болж байна. Гэхдээ МҮАН-ын гишүүд мөн дотооддоо хуралдаж, МАХН-ын бага хурлаас гаргасан шийдвэрийг хэлэлцэн, хүлээж авах эсэхээ шийдсэний дараа хоёр хүчин нэгдэж, сонгуульд оролцох уу, эсвэл тусдаа орох уу гэдэг нь эцэслэгдэх аж.