АНУ-ын Холбооны аюулгүй байдлын тухай хуулийг сахиулагч “Аюулгүй байдал ба арилжааны хороо” (SEC)-оос технологийн салбарт тэргүүлэгч “IBM” корпорацид 10 сая ам.долларын торгуулийг оногдуулсан байна. Учир нь IBM корпораци том хэмжээний гэрээ хэлцлүүдэд ялалт байгуулахын тулд Хятад болон Өмнөд Солонгосын засгийн газрын олон тооны албан хаагчдад 1998-аас 2009 оны хооронд бүтэн 10 гаруй жилийн турш их хэмжээний авлига өгч байсан нь тогтоогджээ.

Тиймээс тус компанийг “Олон улсын авлигын тухай пакт”-ыг зөрчсөн хэмээн үзэж дээрх торгуулийн хэмжээг оноосон байна. IBM компани Хятад, Солонгосын засгийн газрын албан хаагчдад бэлэн мөнгө төдийгүй аялах эрхийн бичиг, электрон хэрэгслүүд гэх мэт эд материалыг хахууль болгон өгч байсан ба нийт хахуулийн хэмжээ хэдэн зуун мянган ам.доллараар тоологдож байгаа ажээ. Харин IBM-ийн зүгээс тус компанид оногдуулсан торгуулийн хэмжээг эсэргүүцээгүй нь авлигын хэргээ хүлээснийг гэрчилж байна.