Залуусын сэтгэлгээг задлан чөлөөт сэтгэлгээг хөгжүүлэх зорилгоор “Оюутолгой” ХХК болон Монголын Реклам бүтээгчдийн холбооноос нийгмийн сэдэвтэй зар сурталчилгааны уралдаант фестивалийг гуравдугаар сарын турш зохион байгуулж байгаа билээ. Анх 2010 онд зохион байгуулагдаж байсан уг фестиваль энэ удаад “Бидэнд ойрхон ирээдүй” нэртэйгээр зохион байгуулагдаж буй бөгөөд өнгөрсөн хугацаанд залуу уран бүтээлчдийг хамруулсан Рекламны форум, Рекламны үзэсгэлэн яармагийг амжилттай зохион байгуулаад байна.

Фестивалийг зохион байгуулагчид залуу уран бүтээлчдээс ирүүлж буй бүтээлүүд Монголын хөгжилд үнэтэй хувь нэмэр оруулж, бүтээлч, шинэлэг агшин болоод асуудал дэвшүүлсэн санааг харуулж чадна хэмээн үзэж буй аж.

15 сая төгрөгийн шагналын сантай уралдаант фестивалийн хүрээнд уран бүтээлчид бүтээлүүдээ ирүүлсээр байгаа бөгөөд энэ сарын сүүлээр шилдэг бүтээлүүд тодрох юм байна. Уран бүтээлчид материалаа ирүүлэхдээ нийгмийн анхаарлыг хандуулах реклам бүтээх бөгөөд тодорхой сэдвийн дагуу видео, фото, радиогийн, хэвлэлийн, вэб анимэшн чиглэлээр бүтээлээ туурвих боломжтой бөгөөд уралдааны талаархи дэлгэрэнгүй мэдээллийг www.adfestivalmongolia.net сайтаас авч болох юм байна.