Улсын драмын эрдмийн театрын тайзнаа тав хоногийн дараа буюу Олон улсын театрын өдөр “Гэгээн Муза” наадмын ялагчид тодорно. Энэ жил найм дахь удаагаа зохион байгуулагдаж буй “Гэгээн муза” наадам драмын жүжиг, дуулалт жүжиг, хүүхдийн жүжиг гэсэн гурван төрлөөр нийт 55 уран бүтээлчид өрсөлдөж байгаа билээ. Энэхүү наадамд Улсын драмын эрдмийн театр, Архангай, Дундговь, Сүхбаатар, Завхан болон Төв аймгийн Хөгжимт драмын театрууд оролцож байна. “Гэгээн муза 8” наадамд өрсөлдөж буй бүтээлүүд эцсийн шатандаа тайзнаа тоглон  өрсөлдөж байгаа юм. Өнөөдөр Хүүхэлдэйн театрын тайзнаа 16.00 цагт Дундговь аймгийн “Төв халхын дуулалт жүжгийн театр”-ын Д.Төрбат, Т.Зөнбилэг нарын “Цагаан гарьдын цадиг” жүжиг тоглогдох гэж байна.  Тус жүжиг нь “Гэгээн муза” наадамд хөгжимт жүжгийн төрөлд өрсөлдөж байгаа бөгөөд “Оны шилдэг жүжгийн зохиолч”-д Д.Төрбат, Т.Зөнбилэг нар, “Оны шилдэг жүжгийн найруулагч”
Д.Доржсүрэн, “Оны шилдэг жүжгийн хөгжмийн зохиолч”-д  Г.Эрдэнэчулуун,  “Оны шилдэг жүжгийн зураач”-д  П.Цэгмид, С.Ариунбямба нар, “Оны шилдэг жүжгийн эрэгтэй гол дүр”-д соёлын тэргүүний ажилтан, жүжигчин Д.Төмөр “Цагаан гарьдын цадиг” жүжгийн Гарьд чин вангийн дүрээр, “Оны шилдэг жүжгийн эмэгтэй гол дүр”-д соёлын тэргүүний ажилтан, жүжигчин Б.Алимцэцэг  “Цагаан гарьдын цадиг” жүжгийн Цагаанцаагийн дүрээр, мөн номинацид соёлын тэргүүний ажилтан, жүжигчин Б.Баярмаа “Цагаан гарьдын цадиг” жүжгийн Дунгар аажийгийн дүрээр тус тус өрсөлдөж байна.
Харин Драмын эрдмийн театрын тайзнаа 19.00 цагт Завхан аймгийн Л.Ванганы нэрэмжит хөгжимт драмын театрын бүтээл Д.Дамдинсүрэн , Д.Нацагдоржийн “Учиртай гурван толгой” дуулалт жүжиг тоглогдоно. Тус жүжиг нь “Гэгээн муза” наадамд хөгжимт жүжгийн төрлөөр өрсөлдөж байгаа бөгөөд “Оны шилдэг жүжгийн найруулагч”-д Л.Лхагважав, “Оны шилдэг жүжгийн зураач”-д Б.Мөнхжаргал, “Оны шилдэг жүжгийн эрэгтэй гол дүр”-д жүжигчин У.Гантулга “Учиртай гурван толгой” жүжгийн Балганы дүрээр, “Оны шилдэг жүжгийн эмэгтэй гол дүр”-д жүжигчин Б.Оюун-Эрдэнэ “Учиртай гурван толгой” жүжгийн Хоролмаагийн дүрээр тус тус нэр дэвшжээ.

Г.Даша