“Хүний хөгжил сан”-гаас олгох 21 мянган төгрөгөө авах гэсэн иргэд сар бүрийн 15-наас хойш ХААН, Капи­тал, Хадгаламж банкны салбаруудын үүдэнд урт дараа­лал үүсгэж байгаа. Харин өчигдөр арилжааны банкуу­дын гадаа мөнгөө авахаар хэдэн метр урт дараалал үүсгэн зогсч байдаг иргэд байхгүй болчихож. Учрыг нь лавлахаар ХААН, Хадгаламж банкны Бөмбөгөр захын хажууд байрлах тооцооны төвөөр орлоо. Арилжааны бан­кууд иргэдийн мөнгийг кар­таар олгодог болно хэ­мээж байснаа нэг тийш нь шийд­сэн юм биш байгаа гэж бодсон  юм. Гэтэл арил­жааны банкуудад холбог­дох байгууллагаас олгосон “Хүний хөгжил сан”-гийн санхүүжилт дууссаны улмаас иргэд дараалал үүсгэн зогсоо­гүй болж таарав. Хадгаламж, Капитал банкны тооцооны төвүүд хаалган дээрээ “Хүний хөгжил сан”-гийн санхүү­­жилт дууссан тул түр хугацаагаар олгохгүйг мэдэгдье. Гуравдугаар сарын 24-нөөс хойш олгоно” гэсэн зарлал наасан байв. Түү­нийг нь уншсан иргэд “Яахаа­раа хүн бүрийн нэр дээр хийчихсэн мөнгөний санхүү­жилт дуусдаг билээ” хэмээн бухимдацгааж буй харагд­сан. Гэхдээ банкны ажилчид энэ талаар тодорхой зүйл мэдэхгүй байв.  Харин тэд “Иргэд “Хүний хөгжил сан”-гийн мөнгийг олгох карт авах хүсэлтээ өөрийн харьяа хороон дээрээ өгч байна. Сүүлийн үед энэ талаар их асуудаг болсон” хэмээж байлаа. ХААН банкны салба­рын мэргэжилтнүүд л гэхэд иргэдэд “Карт авснаар мөнгөө авах гэж урт дараалалд зогсохгүй болно. Дээрээс нь манай банкны нэмэлт үйлчил­гээнүүдийг картаараа дамжуу­лан авч болно” гэх зэр­гээр тайлбарлаж байгаа харагд­сан.

Арилжааны банкууд “Хү­ний   хөгжил сан”-гийн мөн­гийг олгохын тулд иргэдээс 300 төгрөгийн хураамж авч байгаа. Зөвхөн ХААН банк­ны салбаруудаар л гэхэд Монгол Улсын нэг сая гаруй иргэн 21 мянган төгрөгөө авдаг гэсэн тоо бий. Тэгэхээр тус банк  сард ойролцоогоор 300 сая төгрөгийг иргэдийн халааснаас хуримтлуулдаг ажээ.  Тус банкныхан Хө­дөл­мөр, халамж үйлчил­гээний газартай байгуулсан гэрээгээ зөрчиж дур мэдэн 300 төгрөгийн хураамж авч байсан талаар өмнө нь манай сонин мэдээлж байсан билээ. Харин одоо гэрээнд өөрчлөлт оруулах асуудлыг харилцан тохиролцсон болол­той Дээрээс нь “дараалал үүсгэхгүйн тулд” гэсэн шалтгаанаар иргэн тус бүрийг өөрийн банкны харилцагч болгох гээд арилжааны банкуудад “Хүний хөгжил сан”-гийн мөнгөнөөс олох ашиг их байна.   

ХААН банкны Маркетин­гийн албаны дарга М.Чан­цал­маагаас дараах асуултад ха­риулт авлаа.

-Иргэд дараа­лалд зогсохгүйн тулд заавал танай банкны картыг авах ёстой юм уу. Өөр арилжааны банкинд нээлгэ­сэн данс руу нь мөнгийг нь шилжүүлэх бо­ломж байгаа юу?

-Тийм боломж одоогоор байхгүй байна.

-Яагаад?

-Банк хоорондын гүйлгээ хийх боломж “Хүний хөгжил сан”-гийн мөнгөний тухайл бол огт байхгүй.

-Энэ нь танай банкны харилцагчдын тоог тодор­хой хэмжээгээр нэмэгдүүлж байгаа болохоор тэр үү?

-“Хүний хөгжил сан”-гийн мөнгийг картаар олгох болсонтой холбоотойгоор манай банкны харилцагчдын тоо нэмэгдсэн зүйлгүй. Харин ч алдсан гэж ойлгож болно. Манай банкны харилцаг­чид Хадгаламж, Капитал банкнаас эх орны хишгээ авч байгаа  тохиолдол олон бай­гаа шүү дээ.

-Сар бүрийн дунд үеэс танай банкны салбаруудад урт дараалал үүсдэг. Олон хүн ХААН банкны аль ч салбараас мөнгөө авч болохгүй юм уу гэсэн сана­лыг гаргаж байна?

-Тийм боломж мөн л байхгүй. Иргэд данс нээлгээд картаа л авчих хэрэгтэй. Манай банкаар дамжуулж “Хүний хөгжил сан”-гийн мөнгөө авдаг иргэд данс нээлгэчихвэл 21 мянган төг­рөгөө авах гэж өдөржин урт дараалал үүсгэдэг байдал үгүй болох юм. Дээрээс нь данс нээлгэсний дараа цахим банк, мобайл банкны үйлчилгээг ашиглаж болно. Одоогийн байдлаар уг үйлчил­гээг үнэгүй ашиглах эрхийг нээж өгсөн байгаа. Дараалал үүсгэж байгаа хүмүүсийн дунд  мөнгө орсон эсэхийг асуух гэсэн хүн олон байдаг. Тиймээс дээр дурьдсан үйлчилгээг ашиглаад дансныхаа үлдэгд­лийг шалгаж болно.

Тэрбээр ийн ярив. Нэгэнт данс нээлгээд бэлэн мөнгө­ний карт авчихсан иргэд тус банкаар байнга үйлчлүүлдэг болох нь мэдээж. Хадгаламж, Капитал банкнаас мөнгөө авч байгаа, ХААН банкны харилцагч иргэд “Мөнгөө авч байгаа банкиндаа данс нээлгэх бодолтой байгаа. Гэхдээ өмнө нь үйлчлүүлдэг байсан газраараа үйлчлүүл­сэн хэвээр байна” гэх хариултыг өгч байсан. Тэгэхээр эдгээр банкуудын харилцагчдын тоо буурах бус харин ч өсөх бололтой.

Иргэн Л.Энхбаяр:

-Манай гэрийнхэн “Хүний хөгжил сан”-гийн мөн­гөө ХААН банкны “Ард” кино театрын хажуу талд байрладаг салбараас авах хуваарьтай. Мөнгө орсны дараа уг банкин дээр урт дараалал үүсдэг. Одоохондоо тус банкны картыг аваагүй байгаа. Би уг нь Голомт банкаар үйлчлүүлдэг юм. Гэтэл одоо хүссэн, хүсээгүй ч уг банкны харилцагч болох хэрэгтэй бололтой. Бусад банкуудаар дамжуулан мөн­гөө авч буй иргэд ч ялгаагүй.

Зохиогчийн эрх:
"Улс төрийн тойм" сонин