Италийн “Мөнхийн хотын баг”-ийн “мөнхийн ахлагч” Франческо Тотти “Фиорентина”-гийн эсрэг хийсэн тоглолтод гоолдож, Сери А лигийн түүхэнд нэрээ мөнхөллөө. Цагтаа “Бага дэлхийн аварга” гэгддэг байсан Сери А-гийн түүхэнд 200-аас дээш гоол хийсэн ердөө зургаахан тоглогч байдаг аж. Түүний өмнө таван тоглогч нэрээ мөнхлөөд байсан бол Тотти тэнцээ хийсэн уг тоглолтод гоолдсоноор тэдний эгнээнд нэгдсэн байна. Тэрбээр 200 дахь гоолоо торгуулийн цохилтоос хийсэн бол 201 дэх гоолоо цохин оруулж, дубль хийжээ. Өнгөрсөн долоо хоногт “Лацио”-гийн эсрэг хийсэн тоглолтод мөн л хоёр гоол хийсэн алдарт тоглогч маань 37 тоглолтод хоёр ба түүнээс дээш гоол оруулж байжээ. “Лацио”-гийн эсрэг хийсэн тоглолтдоо сэтгэл хангалуун байгаагаа илэрхийлж байсан тэрбээр “Миний амьдралдаа оруулж байсан хамгийн сайхан гоолуудын нэг тэр байлаа” хэмээжээ. Тэрбээр мөн “Нэг өмсгөлтэйгээр алдрын оргилд хүрэхийг үргэлж хүссээр ирсэн. Миний хүсэл мөрөөдөл одоо ч биеллээ олж байгаад туйлын баяртай байна” гэв. 

Багт нь шинэ менежер Винчензо Монтелла ирснээр түүний гайхалтай тоглолтууд эргэн ирээд байгаа. Багийн хуучин босс Клаудио Раньери Тоттигоос илүү Марко Боррьеллог илүүд үзэж байсан учир ахмад тоглогчид өөрийгөө харуулах боломж төдийлөн олдохгүй байсан юм. Харин Монтелла багийг удирдах болсноор Тотти тогтмол гараанд гарч, харин Боррьелло сэлгээ рүү шилжээд байгаа. Түүний шийдвэр ч нүдээ олж, шинэ ажлаа хүлээж авснаас нь хойш хийсэн таван тоглолтод тэд ганц ч хожигдолгүй, гурван хожил авсан юм. 200 гоолын босгыг давсан түүний өмнөх байрт алдарт Роберто Бажжио тавхан гоолын илүүтэй бичигддэг юм. Тотти цаашид тогтмол тоглож чадвал 225 гоолтой уг жагсаалтын хоёрдугаарт жагсдаг “Милан” болон Шведийн домог Гуннар Нордалийг гүйцэх боломжтой.

Тоттигийн хувьд 2001 оны лигийн мэргэн бууч болж, багаа зургаан удаа Сери А-гийн аваргын өрсөлдөөнд оруулж байсан шилдэг тоглогч. Харин түүний гоолын хур буусан жил нь 2007 онд тохиосон бөгөөд тэрбээр лигтээ 26 гоол хийж, улмаар Европын “Алтан Шаахай” шагналын эзэн болж байсан ажээ.