“Айвенхоу Майнз”-ийн эзэмшил “Саусгоби” компани хувьцааныхаа 57.6 хувийг 540 сая ам.доллараар Хятадын төрийн өмчийн “Chalco” компанид зарах болсноо дөрөвдүгээр сарын 1-ний өдөр мэдэгдсэн нь халуун сэдвүүдийн нэг болоод байна. МАХН-ын дарга Н.Энхбаярыг хорьж шалгаж байгаа дуулианы сүрд “Саусгоби”-гийн энэхүү панз наймааны тухай яриа бараг дарагдаад байгаа нь УИХ-ын гишүүн Г.Занданшатарын санааг зовоож байгаа аж.  Тэрбээр “Хэрэв энэ хуулийн төслийг яаралтай хэлэлцэн, баталбал “Саусгоби”-гийн “Чалко”-той хийсэн орд газрын наймааг буцаах бүрэн боломжтой” гэжээ. УИХ-ын гишүүн Г.Занданшатар гадаадын хөрөнгө оруулалтыг хязгаарлах тухай хуулийн төслийг тухайн үед УИХ-д өргөн барьж байжээ. Хэлэлцэх эсэхийг нь УИХ шийдэх хэдий ч зарим шалтгааны улмаас хойшлоод байсан юм. “Энэ хуулийн төсөл зөвхөн уул уурхай биш, батлан хамгаалах салбар, геологи, усны нөөц, тэр ч бүү хэл хэвлэл мэдээлэл зэрэг олон салбарыг хамарсан, тухай тухайн салбарт гадаадын хөрөнгө оруулалтыг зохистой төвшинд байлгах учиртай хууль юм” гэж Г.Занданшатар гишүүн онцолж байна.