Ойрхи Дорнодод үүссэн хямралт байдлын уршгаар зарим улс орнууд интернэт холбоог хэсэгчлэн хааж, боогдуулаад байгаа энэ үед Хятадын засгийн газар ч Хятад дахь Google-ийн имэйль үйлчилгээ болох Gmail-ийг хааж, хэрэглэгчдийг Gmail-д нэвтрэхэд хүндрэл үүсгэжээ. Имэйлийн үйлчилгээ болон вебсайтад техникийн саатал үүсээгүй болохыг Google-ийн инженерүүд баталж байгаа ажээ.
Хятад улс нь интернэт сүлжээнд хамгийн хатуу хяналт тогтоодог дэлхийн цөөн хэдэн улсуудын нэг юм. Тухайлбал Youtube, Facebook, Twitter зэрэг олон нийтийн сүлжээнүүд Хятад улсад одоог хүртэл нэвтэрч чадагүй байна. Түүнчлэн тус улс өнгөрсөн нэгдүгээр сард Ойрхи Дорнодод болсон ширүүн үйл явдлын үеэр интернэтийн хараа хяналтыг улам чангатгаж байсан юм. Харин дэлхийг цочроосон дээрх үйл явдал аль хэдийн намжсан ч, Хятадын засгийн газар интернэт сүлжээнүүдийг блоклох үйл ажиллагаа зогсоогүй байгаа нь онлайн бизнес эрхлэгчдийн дургүйцлийг хүргэж байна.

Б.Энхцэцэг