“Глоб Интернэшнл” төрийн бус байгууллагаас хүний эрхийн баримтат киноны үзлэг зохион байгуулах гэж байна. Үзлэг өнөөдөр 16.00 цагт МҮОНТВ-ийн урд байрладаг Боролдой студийн “Black Box” театрт болох юм. Үзлэг хоёр хэсэгтэй бөгөөд эхний хэсэгт “Глоб Интернэшнл” ТББ-ын Монгол дахь Их Британий Элчин сайдын яамны санхүүжилтээр хэрэгжүүлж буй “Хүний эрхийн мэдээллээр дамжуулан хүнийг чадавхижуулах нь”  төслийн хүрээнд бүтээсэн “Өөрөө өөрийгөө аваад явахыг хүсч байна…”, “Миний охин хамгийн сүүлийнх нь байг . . .”, “Хүчтэний өмнө хүчгүй нь буруутай”, “Нэг өдөр” хэмээх дөрвөн баримтат кино,  хоёр дахь хэсэгт хүний эрхийн бусад төрийн бус байгууллагуудын бүтээсэн “Хүн бүрийн сэтгэлд гал бий”, “Хүн худалдаалах гэмт хэрэг газар авсаар байх уу?” хэмээх кинонууд гарах юм. 

         “Хүний эрхийн мэдээллээр дамжуулан хүнийг чадавхижуулах нь”  төсөл нь уламжлалт болон шинэ хэвлэл мэдээллийн хэрэгслийг ашиглан хүний эрхийн боловсролыг хөхиүлэн дэмжих, олон нийтийн мэдлэг, мөн түүнчлэн бодлого боловсруулагч, шийдвэр гаргагчдын хүний эрхийн зөрчлийн талаарх мэдлэгийг дээшлүүлэх зорилготой юм.

 Энэ зорилгоо биелүүлэхээр “Хүний түүх” цуврал аудио, видео баримтат цувралууд бүтээж байна.

Төслийн хүрээнд бүтээсэн баримтат кинонуудыг, тэдгээрт өгүүлсэн эрхийн хэрэгжилтийн талаарх саналын хамт УИХ, Засгийн газар, холбогдох яам, төрийн болон төрийн бус байгууллагуудад хүргүүлнэ.

Аудио цуврал нь 10 хэсэгтэй бөгөөд ирэх сараас эхлэн 8 аймгийн радиогоор цацахаар болжээ.

Төслийн гол үр нөлөө нь эдгээр бүтээлээр дамжуулан бодлого боловсруулагч, шийдвэр гаргагчид, нийт ард иргэдийн  хүний эрх, эрх чөлөөний талаар мэдлэг боловсролыг дээшлүүлэх явдал аж.