Одоо хэр нь Токио хотод газар хөдлөлтийн чичиргээ мэдрэгдсээр байгаа ч мэргэжлийн сумо бөхийн 69 дэх ёкозуна Хакухо М.Даваажаргал хуваарийн дагуу бэлтгэл сургуулилтаа хийж эхэлжээ. Тэрбээр өнгөрөгч баасан гаригт Кёкүтэнхо Н.Цэвэгнямын харьяалагддаг Ошима дэвжээнд зочилж, тус дэвжээний бөхчүүдтэй 30 барилдаан хийсэн байна.

Сонирхуулахад, Хакухо гэр бүлийн хамт Токио хотын нэгэн өндөр барилгын 44 давхарт амьдардаг бөгөөд газар хөдлөлт, цунамийн улмаас түүний байшингийн цахилгаан шат түр хугацаанд ажиллаагүй учир ёкозуна Хакухо хоёр хоног гэрээсээ гарч чадаагүй гэнэ. Ёкозуна Хакухогийн эхнэр Саёоко Вада өдгөө гурван хүүхдийн хамт төрөлх хот болох Токушимад түр байгаа ажээ.