Байгалийн баялаг, эрдэс, түүхий эд тэр дундаа эрчим хүчний голлох эх үүсвэр болох нүүрсний арвин нөөцдөө тулгуурлан эрчимтэй хөгжих боломж Монголд бий гэдгийг дэлхий нийт хүлээн зөвшөөрөх болсон. Сүүлийн жилүүдэд эдийн засгийн өсөлт өндөр үзүүлэлттэй гарч буй ч зарим тулгамдсан, шийдвэрлэвэл зохих асуудлууд бий. Жишээ нь Монгол Улсад барилгын дулааны алдаглыг багасгах зэрэг хэд хэдэн арга замаар эрчим хүчний хэрэглээг боломжтой бүх газарт бууруулж, хэмнэлт хийх шаардлагатай. Харин тус улс дэлхийн хамгийн хүйтэн уур амьсгалтай орны нэг тул үүнийг хэрэгжүүлэхэд амаргүй хэмээн Олон улсын мэргэжилтнүүд үзэж байна. Энэ тухай баримт тулгуурлан хэлэлцэх Олон улсын бага хурал маргааш Улаанбаатар хотноо “Эрчим хүчний хэмнэлт-Монгол Улсын стратегийн асуудал” сэдвийн хүрээнд зохион байгуулагдах гэж байна.Хурлыг Зам тээвэр, барилга хот байгуулалтын дэд сайд Б.Цэнгэл, ХБНГУ-ын Элчин сайдын үүрэг гүйцэтгэгч ноён Клаус Венделбэргер нар нээх бөгөөд Герман, Энэтхэг, Индонези, БНХАУ, Пакистан болон “UNESCAP”-ын мэргэжилтнүүд өөрсдийн туршлагаа хуваалцан Монгол орны нөхцөлд тохирох зарим шийдлүүдийн талаар танилцуулах аж. Дэлхийн хүн амын гурваны хоёр нь амьдрах Ази тивийн эдийн засгийн хүчин чадал 2050 он гэхэд хоёр дахин нэмэгдэнэ гэж судлаачид үздэг. Хүн ам, эдийн засаг, санхүүгийн өсөлтөөр дэлхийд бусад бүс нутгаас илүүтэй нөлөөлж буй энэ тивийн тулгамдсан асуудал болох байгалийн нөөцийн хомсдол, эрчим хүчний хангамж, уур амьсгалын өөрчлөлт, төлөвлөгөөтэй хотжилт, байгаль орчны доройтол нь Монгол Улсыг тойрохгүй нь тодорхой.
Харин хуралд оролцогч олон улсын эрдэмтэн, мэргэжилтнүүд “Төвлөрсөн дулаан хангамжийн иж бүрэн концепци”, “Эрчим хүчний үйлчилгээний /ESCOs/ компанийн ололт амжилт, тулгамдсан асуудал”, Эрчим хүчний гүйцэтгэлийн гэрээ хэлцэл”, “Нарны эрчим хүчний төхөөрөмж ба хэрэглээ”, “Эрчим хүчний төвлөрсөн систем”, “Хөдөө орон нутгийн дулаан хангамж, шугамын алдагдал, түүний төвлөрсөн систем”, “Хөдөө орон нутгийн дулаан хангамж, шугамын алдагдал, түүнийг бууруулах арга зам”, “Урамшуулалын механизм, нүүрс төрөгчийн давхар исэлийн /CO2/ ялгарлыг бууруулах” зэрэг сэдвээр илтгэл тавьж хэлэлцүүлэх аж.
