Хатагтай Ж.К.Роулингийн шинэ бизнес болох Pottermore цахим хуудасны шинэ хувилбар ирэх сард нээгдэнэ. Энэ цахим хуудас шидтэн хүүгийн ертөнцөөр бүрэн утгаар аялуулахаас гадна хамгийн гол нь Поттерийн адал явдлын цувралуудыг онлайн хэлбэрээр худалдан авч унших боломжийг олгоно.

Уг нь Pottermore онлайн дэлгүүрийг өнгөрсөн аравдугаар сард нээхээр төлөвлөж байсан ч хойшилсоор өдий хүрсэн билээ. Энэхүү төсөл дээр ажиллаж байгаа багийн мэдээлснээр сайтыг олон удаа туршиж үзсэн бөгөөд төлөвлөж байснаас олон хэрэглэгчтэй болох нь тодорхой болсон тул хэрэглэгчдэд аль болох амар хялбар байлгах үүднээс цөөнгүй өөрчлөлтийг хийх шаардлагатай болсон ажээ.