Монголд яг хичнээн банк байгаа вэ гэсэн асуултыг Монголбанкны ерөнхийлөгч Л.Пүрэвдоржоос зарим хүмүүс асууж байлаа. Ингэхээс ч аргагүй. Монгол Улс нэгэн үе арилжааны 16 банктай байснаа нэгийнх нь үйл ажиллагаа доголдож, дампуурлыг нь хараахан зарлаагүй, нөгөөгийнх нь эзэмшил өөрчлөгдсөн. Тэрхүү дуулианы шуугианы дараа Хадгаламж, Монголшуудан банк нэгдэж, тун саяхан Монголшуудан банкны тамгыг албан ёсоор төв банкинд гардуулан өгсөн гэхчилэн банкны салбарыг тойрсон сонирхолтой үйл явц өрнөсөөр байна. Энэ бүхний  дараа Монгол Улсад хичнээн банк албан ёсоор ажиллаж байна вэ гэдэгт Монголбанкны ерөнхийлөгч Л.Пүрэвдорж хариулахдаа:
-Өнөөдөр Монгол Улсад албан ёсоор 15 банк ажиллаж байна. Анод, Зоос гэсэн хоёр банкны үйл ажиллагааг албан ёсоор зогссон. Зоос банкны суурин дээр Төрийн банк байгуулагдан ажиллаж байгаа. Өөрөөр хэлбэл, Зоос банкны хуучин өмчлөгч нар банкны системээс гарсан гэсэн үг. Тус банкийг төр авснаар харилцагч, хадгаламж эзэмшигчдийн эрх ашгийг хамгаалж чадсан. Хадгаламж, Монголшуудан банкны нэгдлийн үйл явц ерөнхийдөө дуусч, Нэгдсэн хадгаламж банк байгуулагдаад байгаа гэлээ.

Д.Цээпил