Испанийн эзэн хааны “Реал Мадрид”-ын дасгалжуулагч Аваргуудын лигийн шөвгийн наймд өөрийн хуучин удирдаж байсан “Интер Милан” болон “Челси” багуудын аль нэгтэй таарахыг хүсэхгүй байна. Жозе Моуриньо удаан хугацааны турш Аваргуудын лигт бүтэлгүйтээд байсан “Реал Мадрид”-ыг долоон жилийн дараа дахин шилдэг наймын тоонд оруулсан билээ. Тэдний баг “Олимпик Лион”-г талбай дээрээ 3:0 харьцаатай буулган авснаар 2004 оноос хойш үзүүлээгүй амжилтдаа хүрсэн юм. Тухайн жил Моуриньо “Порту”-гийн цэргүүдтэй Аваргуудын лигийн цом өргөж, тун удалгүй Лондонг зорьж байлаа. Харин Лондонгийн багаас яваад “Интер Милан”-д нэгдэн гурван цом хүртэж, түүхэн амжилтын эзэн болсон юм. Тэрбээр “Би Челси, Интер Милан багуудтай учраа таараасай гэж хүсэхгүй байна. Учир нь өөрийн хүмүүсийн эсрэг тоглох үргэлж хэцүү байдаг, найзуудынхаа эсрэг бол бүр ч хэцүү” гэжээ. Тэрбээр мөн “Хэрэв оноолт үнэхээр л биднийг таруулах юм бол өөрийн хүмүүс гэдгээ мартаж, мэргэжлийн хөлбөмбөгийн дүрмийг баримтална. Тиймээс өөрийгөө сайн бэлдэх хэрэгтэй байна” хэмээжээ.

Моуриньогийн байр суурь ийм байгаа ч тэд хамгийн хүчтэй өрсөлдөгчид болох Аваргуудын лигийн 2009 оны аварга “Барселона”-тай таарах магадлал ч нээлттэй байгаа. Тэдний дунд гурван тэмцээний өрсөлдөөн байгаа бөгөөд Ла лигт тэд “Барса”-гаас таван онооны дутуу явж байгаа. Харин дөрөвдүгээр сарын 2-нд тэднийг эзэн хааны цомын төлөөх тоглолт хүлээж байна.

“Реал Мадрид” багийн  ерөнхий захирал Валдано Испанийн хоёр багийн дуэлийг тэмцээний сүүл хэсэгт харахыг хүсч байгаагаа хэлсэн. Түүний эмээж байгаа ганц баг бол тэдний домогт ахлагчийг багтаа нэгтгэсэн “Шальке 04” юм. Түүний хэлснээр “Раул бидэн дээр ирвэл дэндүү их сэтгэл хөдлөл, дарамт, ачаа нэмэгдэх болно” гэжээ.